8 Korrik 2026

Egnatia ka bërë një paraqitje karakteri në transfertë, duke marrë një barazim të vlefshëm 1-1 ndaj Petrocub në ndeshjen e parë të raundit të parë eliminator të Champions League.

Kampionët e Shqipërisë kaluan një mbrëmje të vështirë në stadiumin “Hincesti”, pasi përveç golit të pësuar në fillim të sfidës, luajtën pjesën e dytë me një lojtar më pak.

Sfida nisi në mënyrën më të keqe për skuadrën nga Rrogozhina. Vetëm pak sekonda pas vërshëllimës së parë, një pasim i gabuar i kapitenit Aleksit drejt portierit Dajsinani u shfrytëzua nga Popesku, i cili dërgoi topin në rrjetë dhe kaloi Petrocubin në avantazh 1-0.

Egnatia nuk u dorëzua dhe reagoi shpejt, duke kërkuar golin e barazimit. Pas disa përpjekjeve, skuadra shqiptare e gjeti rezultatin në minutën e 35-të. Një aksion i ndërtuar nga Haimes dhe Kryeziu u finalizua nga ky i fundit, që me një goditje të saktë vendosi shifrat në 1-1.

Problemet për Egnatian u shtuan në fundin e pjesës së parë. Kapiteni Aleksi u ndëshkua fillimisht me karton të verdhë për një ndërhyrje në mesfushë, por pas ndërhyrjes së VAR-it, vendimi u ndryshua dhe mesfushori u ndëshkua me karton të kuq.

Në pjesën e dytë, Petrocub ushtroi presion të vazhdueshëm, por portieri Dajsinani ishte protagonisti kryesor i Egnatias, duke kryer disa pritje vendimtare dhe duke mbajtur gjallë rezultatin.

Edhe skuadra shqiptare pati mundësi për të kaluar në avantazh, por rastet e krijuara nuk u konkretizuan.

Në fund, Egnatia siguroi një barazim 1-1 që lë gjithçka të hapur për ndeshjen e kthimit. Sfida vendimtare do të zhvillohet më 15 korrik në Rrogozhinë, ku kampionët e Shqipërisë do të kërkojnë të sigurojnë kalimin në raundin tjetër të eliminatoreve të Champions League.