Deputeti i koalicionit VLEN në Maqedoninë e Veriut, Adnan Azizi, ka reaguar pas raportimeve se ai dhe disa zyrtarë të tjerë nuk u lejuan të hynin në territorin shqiptar përmes pikës kufitare të Qafë Thanës.

Në një mesazh të publikuar në rrjetet sociale, Azizi falënderoi të gjithë ata që, sipas tij, i kanë shprehur mbështetje pas incidentit, duke theksuar se gjatë angazhimit të tij politik nuk është tërhequr përballë asnjë presioni.

"Në gjithë ato vite veprimi politik, nuk na ka trembur e zbrapsur asnjë pushtet e asnjë tiran. Aq më pak këta të Open Ballkanit", shkroi deputeti.

Azizi u shpreh gjithashtu se Shqipëria nuk i përket asnjë force politike dhe se ajo është atdheu i të gjithë shqiptarëve, pavarësisht se kush qeveris në Tiranë.

"Shqipëria nuk është pronë e askujt. Ajo është po aq e jona sa e çdo shqiptari, pavarësisht se kush qeveris në Tiranë. Pushtetet janë të përkohshme. Shqipëria është e përhershme. Shqipëria mbetet gjithmonë e shqiptarëve", theksoi ai.

Reagimi vjen pasi gjatë ditës u publikuan raportime kontradiktore lidhur me kalimin e tij dhe të zyrtarëve të tjerë të VLEN-it në pikën kufitare të Qafë Thanës. Ndërsa vetë zyrtarët pretenduan se u penguan të hynin në Shqipëri, burime nga autoritetet kufitare shqiptare kanë deklaruar se tre prej tyre kishin të drejtë të kalonin kufirin, por zgjodhën të ktheheshin pasi personi i katërt që i shoqëronte nuk u lejua të hynte për shkak të problemeve me dokumentacionin.