8 Korrik 2026

Kryeministri i Groenlandës, Jens-Frederik Nielsen, ka refuzuar sërish idenë e vendosur nga presidenti amerikan Donald Trump për vendosjen e kontrollit të SHBA-së mbi ishullin, duke theksuar se vetëm qytetarët e Groenlandës kanë të drejtë të vendosin për të ardhmen e territorit.

Në një reagim të publikuar në rrjetet sociale, Nielsen u shpreh se deklaratat e përsëritura për marrjen nën kontroll të Groenlandës nuk do të ndryshojnë qëndrimin e autoriteteve vendase.

"E ardhmja e Groenlandës vendoset nga ne në Groenlandë dhe jo nga të tjerët. Thirrjet e përsëritura për marrjen ose kontrollin e vendit tonë nuk e ndryshojnë këtë", deklaroi ai.

Reagimi erdhi pasi Donald Trump, gjatë Samitit të NATO-s, përsëriti se Groenlanda ka rëndësi strategjike për sigurinë kombëtare të Shteteve të Bashkuara dhe se Uashingtoni duhet të ketë kontroll mbi ishullin.

Deklaratat e presidentit amerikan kanë nxitur reagime edhe nga Danimarka. Kryeministrja Mette Frederiksen ritheksoi se pozicioni i Kopenhagës mbetet i pandryshuar, duke nënvizuar se Groenlanda nuk është në shitje.

"Qëndrimi i Shteteve të Bashkuara për këtë çështje është i qartë, por edhe pozicioni ynë ka qenë i pandryshuar gjatë gjithë kohës. Groenlanda nuk është në shitje", u shpreh Frederiksen.

Donald Trump ka shfaqur edhe më parë interes për Groenlandën, duke argumentuar se pozicioni gjeografik dhe burimet natyrore të ishullit e bëjnë atë një territor me rëndësi të veçantë strategjike. Megjithatë, autoritetet e Groenlandës dhe Danimarkës kanë refuzuar vazhdimisht çdo mundësi për transferimin e sovranitetit ose shitjen e territorit.