8 Korrik 2026

Tre zyrtarë shqiptarë nga Maqedonia e Veriut kanë deklaruar se janë përballur me një incident në pikën kufitare të Qafë Thanës, ku, sipas tyre, u penguan të hynin në territorin shqiptar gjatë një udhëtimi me pasaporta diplomatike.

Sipas raportimeve të publikuara nga TV21, në grup ndodheshin koordinatori i grupit parlamentar të VLEN-it, Bekim Qoku, deputeti Adnan Azizi dhe zëvendëssekretari i përgjithshëm i Qeverisë së Maqedonisë së Veriut, Hasim Murtezani.

Zyrtarët pretendojnë se janë mbajtur për rreth një orë në pikën kufitare pa marrë shpjegime mbi arsyet e vonesës. Më pas, sipas tyre, policia kufitare u komunikoi se tre prej tyre mund të vazhdonin udhëtimin, ndërsa personi i katërt që i shoqëronte nuk lejohej të hynte në Shqipëri.

Në shenjë kundërshtimi ndaj këtij vendimi, ata vendosën të mos kalonin kufirin dhe u kthyen mbrapsht. Sipas deklarimeve të tyre, më vonë u njoftuan se ndaj tyre ishte vendosur një masë ndalimi për hyrjen në territorin shqiptar.

Burime të cituara nga media raportojnë se masa mund të lidhet me përfshirjen e tyre të dyshuar në organizimin e protestave të zhvilluara së fundmi në Tiranë, të njohura si "Revolucioni Flamingo". Megjithatë, deri në këto momente nuk ka një reagim apo konfirmim zyrtar nga autoritetet shqiptare mbi arsyet e ndalimit ose ekzistencën e një vendimi të tillë.

"Revolucioni Flamingo" u shfaq në fund të muajit maj 2026 si një lëvizje qytetare kundër ndërhyrjeve në zonat e mbrojtura të Lagunës së Nartës, Zvërnecit dhe projekteve të zhvillimit në Ishullin e Sazanit, për t’u zgjeruar më pas në protesta me karakter më të gjerë kundër qeverisë.