Një moment gjatë fotografisë zyrtare në Samitin e NATO-s është bërë viral në rrjetet sociale, pasi sekretari i përgjithshëm i Aleancës, Mark Rutte, tentoi t’i tërhiqte vëmendjen presidentit amerikan Donald Trump për këpucët e kryeministrit shqiptar Edi Rama.

Sipas raportimit të medias “The News”, episodi ndodhi përpara kamerave, gjatë momentit kur liderët e vendeve anëtare të NATO-s, mes tyre Trump dhe presidenti turk Recep Tayyip Erdoğan, ishin mbledhur për fotografinë familjare.

Sipas pamjeve të publikuara, Rutte i bëri me shenjë Trumpit drejt këpucëve të bardha të kryeministrit Rama, duke tentuar të marrë një reagim nga presidenti amerikan. Fillimisht, Trump nuk shfaqi interes të dukshëm, ndërsa më pas, pasi uli shikimin, reagimi i tij i rezervuar u komentua gjerësisht online.

Videoja e momentit u shpërnda në masë në platformat sociale, ku përdorues të shumtë komentuan ndërveprimin mes dy drejtuesve të NATO-s.

Këpucët sportive të Edi Ramës kanë tërhequr edhe më parë vëmendjen në takime ndërkombëtare, për shkak të kombinimit të tyre me veshjen zyrtare.