Parlamenti Evropian ka miratuar një rezolutë për Serbinë, ku vlerëson se vendi ka shënuar përparim të kufizuar në procesin e anëtarësimit në Bashkimin Evropian për shkak të problemeve në sundimin e ligjit, funksionimin e demokracisë dhe mungesës së përafrimit me politikën e jashtme dhe të sigurisë së BE-së.

Në dokument theksohet se Serbia nuk ka përmbushur shumicën e angazhimeve të marra në dokumentin joformal të vitit 2024, i cili synonte heqjen e pengesave për hapjen e Kapitullit 3 të negociatave. Eurodeputetët dënojnë gjithashtu retorikën e autoriteteve serbe ndaj vendeve anëtare që kundërshtuan hapjen e këtij kapitulli.

Rezoluta rikujton se, ndonëse Beogradi e konsideron anëtarësimin në BE si objektiv strategjik, ky qëndrim nuk është shoqëruar me veprime konkrete. Parlamenti Evropian u bën thirrje autoriteteve serbe të dëshmojnë me hapa të qartë përkushtimin ndaj vlerave evropiane dhe të harmonizojnë plotësisht politikën e jashtme me atë të Bashkimit Evropian, përfshirë sanksionet ndaj Rusisë.

Eurodeputetët shprehin shqetësim për marrëdhëniet e ngushta të Serbisë me Rusinë dhe Kinën, duke theksuar se thellimi i këtyre partneriteteve ngre pikëpyetje serioze mbi orientimin strategjik të vendit. Në rezolutë thuhet se politika e balancimit mes BE-së dhe aktorëve të tjerë gjeopolitikë nuk është në përputhje me pritshmëritë për një shtet kandidat.

Dokumenti dënon gjithashtu forcimin ushtarak të Serbisë, zgjerimin e bashkëpunimit në fushën e mbrojtjes me Kinën, si dhe blerjen e raketave balistike kineze CM-400AKG, duke paralajmëruar se këto zhvillime mund të cenojnë stabilitetin dhe sigurinë rajonale.

Parlamenti Evropian shpreh shqetësim edhe për ndikimin rus në Serbi, duke e cilësuar vendin si një qendër të rëndësishme për aktivitetet hibride, përhapjen e dezinformatave dhe operacionet e inteligjencës ruse në Ballkanin Perëndimor. Autoriteteve në Beograd u kërkohet të hetojnë dhe të ndalojnë çdo aktivitet të tillë.

Sa i përket negociatave të anëtarësimit, rezoluta thekson se Serbia duhet të shënojë përparim të prekshëm në sundimin e ligjit, luftën kundër korrupsionit dhe krimit të organizuar, pavarësinë e gjyqësorit, lirinë e medias, reformat demokratike dhe harmonizimin me politikën e jashtme të BE-së përpara se procesi i integrimit të avancojë.

Parlamenti Evropian i bën gjithashtu thirrje Komisionit Evropian të mbajë një qasje më të vendosur ndaj Serbisë dhe të reflektojë çdo regres në reformat demokratike edhe në mbështetjen financiare të para-anëtarësimit.

Rezoluta u miratua në një kohë kur shtetet anëtare të Bashkimit Evropian po diskutojnë mundësinë e hapjes së Kapitullit 3 të negociatave me Serbinë. Megjithatë, shumica e eurodeputetëve që morën pjesë në debat shprehën kundërshtimin e tyre ndaj këtij hapi, duke kërkuar përmbushjen e reformave të kërkuara nga Beogradi.