Çmimet e naftës në tregjet ndërkombëtare shënuan një rritje të ndjeshme gjatë së mërkurës, pasi presidenti i Shteteve të Bashkuara, Donald Trump, deklaroi se armëpushimi me Iranin ka përfunduar, duke shtuar shqetësimet për një përshkallëzim të ri të tensioneve në Lindjen e Mesme.

Deklarata e Trump erdhi pas rifillimit të përplasjeve në rajon, në vijim të sulmeve ndaj anijeve tregtare në Ngushticën e Hormuzit, për të cilat Uashingtoni akuzon Teheranin.

Rreth orës 08:30 GMT, nafta e tipit Brent për dorëzim në shtator u rrit me 5,26%, duke arritur në 78,06 dollarë për fuçi. Ndërkohë, nafta amerikane West Texas Intermediate (WTI) për dorëzim në gusht u rrit me 5,32%, në 74,19 dollarë për fuçi.

Tregjet reaguan menjëherë ndaj zhvillimeve të fundit, pasi investitorët vlerësojnë se pasiguria në Ngushticën e Hormuzit – një nga korridoret më strategjike për transportin e naftës në botë – mund të ndikojë në furnizimin global me energji dhe të ushtrojë presion mbi çmimet.

Në të njëjtën kohë, Komanda Qendrore e SHBA-së (CENTCOM) njoftoi se forcat amerikane kanë goditur më shumë se 80 objektiva në territorin iranian, në përgjigje të sulmeve të fundit ndaj anijeve tregtare në Ngushticën e Hormuzit.

Sipas CENTCOM, objektivat përfshinin sisteme të mbrojtjes ajrore, raketa kundër anijeve, si dhe mbi 60 mjete lundruese të vogla që i përkisnin Korpusit të Gardës Revolucionare Islamike (IRGC), të vendosura në ose pranë Ngushticës së Hormuzit.

Autoritetet amerikane deklaruan se operacioni u ndërmor pas sulmeve ndaj tre anijeve tregtare që lundronin nën flamujt e Ishujve Marshall, Liberisë dhe Arabisë Saudite, ndërsa theksuan se SHBA mbetet e gatshme të reagojë ndaj çdo shkeljeje të marrëveshjes së arritur muajin e kaluar.