VANCOUVER, Kanada – Zvicra është çerekfinalistja e fundit e Kupës së Botës 2026, pasi mposhti Kolumbinë 4-3 me penallti, pas një ndeshjeje që u mbyll 0-0 në kohën e rregullt dhe pas 120 minutash lojë. Në fazën çerekfinale, helvetët do të përballen me Argjentinën.

Takimi i zhvilluar në stadiumin "BC Place" ishte i luftuar, fizik dhe me pak raste të pastra shënimi. Kolumbia pati më shumë kontroll të lojës në fillim, ndërsa mungesa e sulmuesit Manzambi për shkak dëmtimi ndikoi në repartin ofensiv të Zvicrës.

Pavarësisht kësaj, skuadra e drejtuar nga Murat Yakin krijoi disa situata të rrezikshme, me Granit Xhakën që udhëhoqi mesfushën. Portieri kolumbian Camilo Vargas u detyrua të ndërhynte dy herë me pritje vendimtare për të mbajtur portën të paprekur në pjesën e parë.

Në krahun tjetër, rasti më i mirë për Kolumbinë erdhi nga Gustavo Puerta, ndërsa Luis Díaz zhvilloi një ndeshje nën pritshmëri, pa arritur të regjistronte asnjë goditje në kuadrat.

Edhe pjesa e dytë u karakterizua nga kujdesi i tepruar dhe mungesa e rasteve konkrete. Të dyja skuadrat shmangën rrezikun, duke e çuar sfidën fillimisht në kohën shtesë.

Në 30 minutat shtesë, Kolumbia iu afrua golit me dy raste të mira, ndërsa Zvicra u kundërpërgjigj me një goditje të fortë që u ndal nga Vargas. Momenti më i mirë i ndeshjes erdhi në fund, kur një gabim i Granit Xhakës i dha Jaminton Campaz mundësinë të shënonte i vetëm përballë portierit, por sulmuesi kolumbian e dërgoi topin mbi traversë.

Fituesi u vendos nga pika e bardhë. Kolumbia humbi penalltinë e parë me Sánchez, ndërsa më pas Manuel Akanji gaboi për Zvicrën, duke mbajtur serinë në ekuilibër. Momenti vendimtar erdhi kur Gregorio "Cucho" Hernández u ndal nga portieri Gregor Kobel, ndërsa Ruben Vargas realizoi penalltinë e fitores, duke vulosur suksesin 4-3 të Zvicrës.

Me këtë triumf, Zvicra siguron biletën për në çerekfinalet e Kupës së Botës 2026, ku do të përballet me Argjentinën për një vend në gjysmëfinale.