Unë nuk jam dakord!

Nga Mentor Kikia

Të më falin ata që e shijojnë muzikën e tij, por mua nuk më gërric fare. Ndaj, ato 2 eurot që u përkasin taksave të mia, nga 4 milionë që qeveria i dhuroi këtij tipi sot, unë nuk jam dakord t’ia dhuroj.

E para, ky të bëjë koncert sa herë të dojë, si të gjithë këngëtarët. Të paguajë vendin, skenën, të shesë biletat e të fitojë para. Zoti ia shtoftë zërin dhe paratë.

E dyta, u tha se ishte një koncert privat. Por, për të shitur biletat e tij, e gjithë qeveria, parlamenti dhe trupi diplomatik kanë një muaj që janë shndërruar në agjenci shitjeje biletash. Por, po themi se nuk ka ndonjë gjë të keqe këtu.

E treta dhe më e rënda, qeveria ime nxori para nga buxheti rezervë i shtetit, që preket për raste emergjencash e fatkeqësish.

Cila është fatkeqësia në rastin konkret?

Me 4.2 milionë euro mund të kishim blerë një avion zjarrfikës, pasi vetëm këtë fundjavë u dogjën mbi 200 hektarë ullishta e pemëtore në Shqipëri, e zjarrfikësit mbetën me degë pemësh në duar. Do të isha dakord që jo 4.2, por 14 milionë të nxirreshin nga fondi rezervë për këtë punë.