Një akullore shtëpie, me pak yndyrë dhe sheqer, që mban aromë rozmarine dhe na freskon në vapë në mënyrën më të shijshme.

Akullorja është ëmbëlsira absolute e verës. Kur temperaturat janë shumë të larta, i lëmë mënjanë të gjitha ëmbëlsirat e tjera dhe duam të hamë diçka të lehtë dhe freskuese çdo ditë.

Pikërisht për këtë arsye, shpesh zgjedhim të blejmë jashtë atë që na shkon ndër mend, duke shijuar diçka të shijshme dhe freskuese, por njëkohësisht duke e rënduar organizmin me kalori shtesë, sheqer, yndyrë, konservues e të tjera.

Megjithatë, t’i përgatisim të gjitha këto në shtëpi me përbërës tanët, më të shëndetshëm, nuk është aq e vështirë sa e imagjinojmë. Përkundrazi, mund të bëhet edhe shumë më krijuese, pasi me pak më shumë fantazi mund të dalin jo vetëm ide më ushqyese, por edhe shije më origjinale se ato që gjejmë në treg.

Prandaj edhe ne ju propozojmë të përgatisni në shtëpi një akullore me limon, kos, mjaltë dhe… rozmarinë!

Akullore limoni me mjaltë dhe rozmarinë

Përbërësit për 6 porcione

Lëngu i 6 limonëve

Lëkura e grirë e 3 limonëve

750 g kos i kulluar

375 ml qumësht i freskët i plotë

6 lugë çaji mjaltë

Një majë kripe

1 degë rozmarinë e freskët

Përgatitja

Në një tenxhere hedhim qumështin dhe rozmarinën. I ngrohim në zjarr të fortë derisa të marrin një valë dhe më pas e heqim tenxheren nga zjarri.

E lëmë qumështin të ftohet shumë mirë dhe më pas e kullojmë për të hequr rozmarinën.

Vendosim të gjithë përbërësit në një tas metalik relativisht të cekët dhe i përziejmë mirë me tel kuzhine, derisa masa të bëhet e njëtrajtshme dhe pak e ajrosur.

E mbulojmë me qese kuzhine, duke e vendosur qesen direkt mbi sipërfaqen e masës, pastaj me kapak, dhe e fusim tasin në ngrirje për gjysmë ore.

Kur masa të fillojë të ngrijë dhe të krijojë kristale, e rrahim pak nga pak në blender ose grirëse, që të bëhet kremoze, dhe më pas e vendosim sërish në tas në ngrirje.

E përsërisim këtë proces çdo gjysmë ore, të paktën 4 herë, derisa masa të ngrijë mirë, por të mbetet e butë, kadife dhe pa kristale.

E shërbejmë në tasa të vegjël, me lëkurë të freskët limoni të grirë dhe disa gjethe shtesë rozmarine të freskët.

Fotografia: Shutterstock