Gabimi më i madh i bukurisë që bëjnë gratë pas të 50-ave

Pas të 50-ave, grimi i rëndë nuk e favorizon lëkurën. Shihni çfarë i nevojitet vërtet lëkurës së pjekur për shkëlqim, tonifikim dhe një pamje më rinore, sipas një estetisteje.

Ekziston një keqkuptim i madh rreth bukurisë pas të 50-ave. Shumë gra besojnë se sa më shumë ndryshon lëkura e tyre, aq më shumë grim u nevojitet për t’u dukur “të çlodhura”, të ndritshme apo më të reja. Në realitet, ndodh pikërisht e kundërta.

Lëkura pas të 50-ave nuk kërkon më shumë mbulim. Ajo kërkon cilësi më të mirë. Kërkon hidratim, teksturë të duhur, shkëlqim dhe kujdes që respekton nevojat e lëkurës së pjekur. Dhe kjo është diçka që e shoh çdo ditë si estetiste: kur lëkura është e trajtuar siç duhet, grimi vendoset bukur, pa teprime.

Gabimi më i madh pas të 50-ave

Gabimi më i shpeshtë është përdorimi i tepërt i produkteve mbuluese. Foundation i rëndë, shumë pudër dhe vendosje shtresash që në fund nxjerrin më shumë në pah rrudhat, tharjen dhe lëshimin e lëkurës, në vend që t’i “fshehin” ato.

Lëkura e pjekur ndryshon. Ajo humbet gradualisht kolagjen, dehidratohet më lehtë, bëhet më e hollë dhe shfaq më qartë shenjat e lodhjes. Për këtë arsye, grimi i rëndë nuk funksionon njësoj si në moshën 25 apo 35 vjeç. Përkundrazi, mund ta bëjë fytyrën të duket më e lodhur dhe më e ashpër.

Ajo që i nevojitet vërtet lëkurës

Fjala kyçe është: glow. Jo yndyrë. Jo shkëlqim i tepruar. Por një ndriçim i shëndetshëm dhe natyral, që tregon se lëkura është e kujdesur mirë.

Kjo nis nga hidratimi i duhur, forcimi i barrierës hidrolipidike, eksfolimi i butë, trajtimet që përmirësojnë cilësinë e lëkurës dhe, natyrisht, një rutinë skincare me përbërës aktivë që funksionojnë realisht.

Rutina skincare që ndryshon pamjen e fytyrës

Pas të 50-ave, skincare nuk është “luks”. Është baza mbi të cilën edhe grimi më i thjeshtë do të duket bukur.

Ajo që zakonisht rekomandoj është pastrim, por pa e tharë lëkurën, serum me acid hialuronik për hidratim të thellë, peptide ose retinol për tonifikim, vitaminë C për shkëlqim, përdorim të përditshëm të produkteve me mbrojtje nga dielli dhe një krem nate më të pasur për rikuperim.

Kur lëkura është e hidratuar siç duhet, edhe një skin tint ose një concealer i lehtë mjafton që fytyra të duket e freskët dhe e çlodhur.

Trajtimet që bëjnë më shumë diferencë se grimi

Shumë gra investojnë vazhdimisht në foundation-e të reja, ndërkohë që ndryshimi më i madh do të vinte nga një trajtim i duhur i fytyrës.

Trajtimet që ndihmojnë realisht pas të 50-ave janë mezoterapia hidratuese, radiofrekuencat për tonifikim, oxygen facial për shkëlqim, terapia LED, peeling-et e buta dhe trajtimet me kolagjen.

Qëllimi nuk është të “ndryshohet” fytyra. Qëllimi është që ajo të duket më e çlodhur, më e pastër dhe më e ndritshme, pa pasur nevojë për grim të tepruar.

Grimi i tepërt rrallë është shumë favorizues. Megjithatë, në moshat më të reja, teprimi mund të falet më lehtë. Pas të 50-ave, përkundrazi, ai ka tendencën t’i shtojë peshë lëkurës.

Foto: Unsplash

Grimi pas të 50-ave duhet të jetë më natyral

Estetika moderne nuk ka lidhje me contouring-un e rëndë dhe teksturat mat që i japin fytyrës një pamje të ftohtë. Më shumë favorizojnë teksturat e lehta, produktet kremoze, shkëlqimi natyral, foundation-et hidratuese, blush-i që i jep gjallëri fytyrës, vetullat e rregulluara siç duhet dhe një vështrim i ndritshëm.

Rregulli është ky: gratë duken më të reja kur vendosin më pak grim, por kanë një lëkurë më të mirë.

Bukuria pas të 50-ave nuk kërkon mbulim, por cilësi

Ky është ndoshta mesazhi më i rëndësishëm. Pas të 50-ave, bukuria bëhet më shumë çështje cilësie dhe më pak çështje “korrigjimi”.

Fytyra nuk ka nevojë të duket e ngrirë apo tepër mat për të qenë e bukur. Ajo ka nevojë për gjallëri, kujdes dhe shëndet.

Kur investoni siç duhet në lëkurën tuaj, grimi bëhet thjesht prekja e fundit, jo “maska” që duhet të fshehë gjithçka.

Olivia Wilde / Krediti i fotos: AP