7 korrik 2026 – Trajneri i Egjiptit, Hossam Hassan, ka reaguar ashpër pas humbjes dramatike ndaj Argjentinës, duke ngritur akuza për mënyrën se si u zhvillua ndeshja e vlefshme për Kupën e Botës.

Në konferencën për shtyp pas sfidës, Hassan deklaroi se beson se rezultati është ndikuar nga vendimet e gjyqtarit dhe ndërhyrjet e VAR-it, duke pretenduar se skuadra e tij nuk është trajtuar në mënyrë të drejtë.

“Do të them atë që kam në mendje, pavarësisht pasojave. Kjo ishte qartësisht një ndeshje e manipuluar dhe e gjithë bota e pa”, u shpreh trajneri egjiptian.

Ai kritikoi disa vendime të marra gjatë ndeshjes, duke përmendur anulimin e një goli dhe një situatë të diskutueshme në zonën e rreptësisë.

“Një penallti u anulua, e cila duhej të ishte rishikuar nga VAR-i, ndërsa goli i dytë u anulua për një arsye që nuk e kuptojmë. Pse nuk ka drejtësi në futboll?”, deklaroi Hassan.

Trajneri egjiptian vlerësoi paraqitjen e skuadrës së tij, duke thënë se lojtarët largohen me kokën lart pavarësisht eliminimit.

“Nuk jam i bindur nga ky rezultat dhe nga mënyra se si u zhvillua ndeshja. Na trajtuan padrejtësisht, por jam krenar për lojtarët e mi”, tha ai.

Hassan kritikoi gjithashtu orarin e zhvillimit të ndeshjes, duke e cilësuar të papërshtatshëm zhvillimin e një sfide në mesditë, ndërsa deklaroi se nuk do të ndjekë më ndeshjet e këtij Botërori si formë proteste ndaj asaj që ai e cilësoi mungesë besueshmërie.

Argjentina siguroi kualifikimin në çerekfinale pas një përmbysjeje 3-2 ndaj Egjiptit, me golin vendimtar të shënuar në minutat shtesë.