7 korrik 2026 – Sulmuesi i Egjiptit, Mostafa Ziko, ka reaguar me tone të ashpra pas eliminimit të skuadrës së tij nga Kupa e Botës, duke pretenduar se gjykimi ndikoi në rezultatin e ndeshjes ndaj Argjentinës.

Ziko ishte një nga protagonistët e sfidës, pasi fillimisht iu anulua një gol, ndërsa më pas realizoi golin që e çoi Egjiptin në avantazhin 2-0. Megjithatë, Argjentina arriti të përmbyste rezultatin dhe të fitonte 3-2, duke siguruar kualifikimin në çerekfinale.

Pas përfundimit të ndeshjes, lojtari egjiptian, i përlotur para kamerave, kritikoi ashpër vendimet e arbitrit.

“Ishim brilantë ndaj kampionëve në fuqi, por gjyqtari ishte qartësisht kundër nesh që nga fillimi i ndeshjes. Ai përpiqej vazhdimisht të na ndalte”, deklaroi Ziko.

Më tej, sulmuesi shtoi: “Urime Argjentinës për Kupën e Botës, turneu është i trukuar. Nuk kanë nevojë për asgjë tjetër. Gjyqtari ishte i padrejtë”.

Akuzat e lojtarit vijnë pas një sfide dramatike, ku Egjipti humbi avantazhin prej dy golash dhe u eliminua nga turneu pas golit të Enzo Fernández në minutat shtesë.