Tiranë, 7 korrik 2026 – Ka nisur në Tiranë dita e 38-të radhazi e protestës së qytetarëve kundër qeverisë. Pjesëmarrësit u mblodhën në sheshin "Skënderbej", prej nga marshuan drejt godinës së Kryeministrisë, ku pritet të zhvillohen fjalimet e organizatorëve dhe protestuesve.

Gjatë marshimit, qytetarët mbanin pankarta dhe flamuj kombëtarë, ndërsa kërkuan dorëheqjen e kryeministrit Edi Rama dhe ndryshime në drejtimin e vendit.

Në protestë morën pjesë qytetarë të grupmoshave dhe profesioneve të ndryshme, përfshirë të rinj, studentë, pensionistë dhe aktivistë.

Protestuesit ritheksuan pesë kërkesat e tyre, ndër të cilat dorëheqjen e kryeministrit, krijimin e një qeverie teknike dhe ndryshime kushtetuese.

Gjatë tubimit, disa pjesëmarrës dhanë deklarata për mediat, duke shprehur pakënaqësi për situatën ekonomike dhe qeverisjen. Një prej tyre pretendoi se ishte larguar nga puna për arsye politike, ndërsa një tjetër kritikoi përdorimin e fondeve publike, duke kërkuar që ato të orientohen drejt mbështetjes së pensionistëve.

Në protestë u shfaqën gjithashtu pankarta drejtuar Ambasadës së Shteteve të Bashkuara në Tiranë, me kërkesa për një qëndrim mbi situatën politike në vend. Ndërkohë, një pjesëmarrës i ardhur nga Italia e cilësoi protestën si paqësore dhe bëri thirrje për adresimin e problemeve sociale dhe ekonomike që, sipas tij, kanë nxitur emigrimin e qytetarëve shqiptarë.