ROMË – Hetimet për atentatin me lëndë shpërthyese ndaj gazetarit investigativ të RAI-t, Sigfrido Ranucci, kanë marrë një zhvillim të ri. Sipas Prokurorisë së Romës, si porositës i dyshuar i sulmit po hetohet biznesmeni dhe ish-botuesi Valter Lavitola, i dënuar më parë për tentativë shantazhi ndaj ish-kryeministrit italian Silvio Berlusconi.

Ranucci është shprehur i tronditur nga ky zhvillim, duke deklaruar se e njihte prej vitesh Lavitolën.

"Jam i shokuar. Me Lavitolën jemi miq. Nuk arrij ta besoj," është shprehur gazetari.

Sipas mediave italiane, Lavitola është kontrolluar nga karabinierët dhe ndodhet nën hetim së bashku me një person tjetër, i dyshuar se ka ndërmjetësuar kontaktet me autorët e dyshuar të atentatit. Të dy pritet të merren në pyetje nga prokurorët.

Ndërkohë, katër persona të arrestuar javën e kaluar dyshohet se janë autorët materialë të vendosjes së lëndës shpërthyese pranë banesës së Ranuccit. Hetuesit besojnë se njëri prej tyre ka siguruar automjetin e përdorur, ndërsa të tjerët kanë kryer vëzhgimin dhe kanë vendosur eksplozivin.

Një nga çështjet kryesore që po hetohet është motivi i atentatit. Prokuroria po verifikon nëse sulmi lidhet me marrëdhënie personale apo me aktivitetin profesional të gazetarit. Emisioni investigativ "Report", i drejtuar nga Ranucci, ka trajtuar edhe më parë çështje që lidhen me Lavitolën, megjithëse deri tani nuk është bërë publik ndonjë motiv i mundshëm që mund të ketë çuar në organizimin e sulmit.

Sipas autoriteteve italiane, pista që lidhte atentatin me organizatën kriminale Camorra ose me shtetas shqiptarë është zbehur ndjeshëm gjatë hetimeve dhe aktualisht konsiderohet e pabazuar. Ky vlerësim është bërë edhe pas analizimit të një emaili anonim të marrë nga hetuesit, i cili përjashtonte përfshirjen e klanit Moccia.

Hetimet vijojnë, ndërsa autoritetet theksojnë se personat nën hetim gëzojnë prezumimin e pafajësisë deri në një vendim përfundimtar të drejtësisë.