FIER – Zbardhen detaje të reja lidhur me rastin e dhunimit të një 17-vjeçareje në Fier, ngjarje që u bë publike pas publikimit të një videoje në rrjetet sociale, ku e mitura shfaqet duke u goditur fizikisht nga dy adoleshente, ndërsa një person i tretë filmon të gjithë episodin.

Sipas të dhënave hetimore, ngjarja ka ndodhur më 8 qershor 2026 në banesën e një 19-vjeçareje në Fier. Pas kallëzimit të bërë nga 17-vjeçarja, Policia nisi procedimin penal ndaj tre të miturave, të cilat kanë deklaruar se e kanë dhunuar viktimën për motive të dobëta.

Njëra prej 15-vjeçareve të dyshuara u arrestua më 28 qershor, pas një kallëzimi të bërë nga nëna e saj, e cila pretendoi se ishte dhunuar nga e bija. Më pas, e mitura u dërgua për trajtim në spitalin psikiatrik në Tiranë.

Ndërkohë, Prokuroria pranë Gjykatës së Shkallës së Parë të Juridiksionit të Përgjithshëm Fier njoftoi se ka regjistruar procedim penal për veprën "Heqja e paligjshme e lirisë", kryer në bashkëpunim, ndërsa me vendim gjykate është caktuar masë sigurimi ndaj njërës prej të miturave në konflikt me ligjin.

Organi i akuzës bëri të ditur se hetimet po vijojnë për të sqaruar plotësisht rrethanat e ngjarjes, për të përcaktuar përgjegjësitë penale të të gjithë personave të përfshirë, si dhe për të verifikuar mënyrën e realizimit, ruajtjes dhe shpërndarjes së videos në rrjetet sociale.

Në deklaratën zyrtare, Prokuroria u bëri thirrje qytetarëve, administratorëve të faqeve në rrjetet sociale dhe mediave të mos publikojnë apo shpërndajnë pamje ose të dhëna që mund të çojnë në identifikimin e të miturve të përfshirë, duke theksuar se mbrojtja e privatësisë dhe interesit më të lartë të fëmijës është një detyrim ligjor.