SUEDI – Vrasja e 20-vjeçarit shqiptar, Gent Maksutaj, ka tronditur opinionin publik në Suedi, ndërsa po dalin detaje të reja për jetën dhe ëndrrat e tij. I riu kishte përfunduar së fundmi studimet dhe synonte të ndërtonte një karrierë si arkitekt.

Sipas mediave suedeze, Maksutaj u qëllua për vdekje mbrëmjen e së dielës në zonën Kvarngärdet, në Uppsala. Hetuesit po shqyrtojnë mundësinë që ai të ketë qenë një kalimtar i rastësishëm, i përfshirë pa dashje në një incident me armë që dyshohet të ketë lidhje me përplasjet mes grupeve kriminale.

Familjarët dhe miqtë e kanë kujtuar 20-vjeçarin si një djalë të përkushtuar ndaj studimeve, me plane dhe ambicie për të ardhmen. Humbja e tij ka shkaktuar dhimbje të thellë si në komunitetin shqiptar, ashtu edhe në atë suedez.

Ndërkohë, autoritetet suedeze vijojnë hetimet për zbardhjen e plotë të rrethanave të ngjarjes. Një i ri rreth 18 vjeç është ndaluar si i dyshuar në lidhje me vrasjen, ndërsa motivi i krimit mbetet ende nën hetim.