Këlcyrë – Banorët e fshatit Topojan, në njësinë administrative Sukë të Bashkisë Këlcyrë, kanë nisur vetë riparimin e segmenteve më të dëmtuara të rrugës që lidh zonën me pjesën tjetër të territorit, duke kërkuar ndërhyrje nga institucionet vendore.

Sipas banorëve, mungesa e investimeve për mirëmbajtjen e infrastrukturës rrugore gjatë viteve i ka detyruar ata të kontribuojnë me mjete financiare dhe punë fizike për ta bërë rrugën të kalueshme.

Ndërhyrjet e tyre konsistojnë në hedhjen e materialeve mbushëse në pjesët më problematike të rrugës, me qëllim shmangien e vështirësive në qarkullim dhe izolimit të fshatit, veçanërisht gjatë periudhave me reshje, kur gjendja e segmentit përkeqësohet.

Banorët shprehen se kanë adresuar disa herë kërkesa pranë Bashkisë së Këlcyrës për rehabilitimin e rrugës, por sipas tyre, deri tani nuk është realizuar asnjë ndërhyrje konkrete.

Ata kërkojnë që autoritetet vendore të marrin masa për përmirësimin e infrastrukturës, duke e cilësuar rrugën si një lidhje të rëndësishme për jetën e përditshme dhe lëvizjen e komunitetit.