Tiranë – Kryeministri Edi Rama ka deklaruar se ndërtimi i një spitali të ri të ekselencës në Tiranë do të shënojë një fazë të re për sistemin shëndetësor në vend, duke mundësuar trajtimin e rasteve të komplikuara mjekësore.

Gjatë një aktiviteti ku u diskutua për projektin, Rama falënderoi përfaqësuesit e grupit italian San Donato për bashkëpunimin, duke theksuar se marrëveshja për ndërtimin e spitalit është një hap i rëndësishëm në forcimin e shërbimeve shëndetësore.

“Kemi një kapitull të ri për shëndetësinë. Ky spital do të trajtojë edhe sëmundjet e komplikuara dhe do t’u japë qytetarëve mundësi të reja për kujdes të specializuar shëndetësor”, u shpreh Rama.

Kryeministri vlerësoi gjithashtu rolin e bashkëpunimit shqiptaro-italian dhe falënderoi ekipin që është angazhuar në realizimin e projektit. Ai bëri të ditur se synohet që punimet të përfundojnë në vjeshtën e vitit 2028.

Rama shprehu mirënjohje edhe për ambasadorin italian në Tiranë, Marco Alberti, duke e cilësuar bashkëpunimin mes dy vendeve si një proces në zhvillim të vazhdueshëm.

Sipas kryeministrit, projekti i spitalit të ekselencës është pjesë e përpjekjeve për të sjellë standarde të reja në shërbimet shëndetësore dhe për të zgjeruar mundësitë e trajtimit brenda vendit.