Gjirokastër – Një vatër zjarri është regjistruar paraditen e sotme pranë godinës së Postës Shqiptare në Pazarin e Gjirokastrës, duke shkaktuar përfshirjen nga flakët të një pjese të objektit në zonën e tabelave reklamuese.

Zjarri paraqiti rrezik jo vetëm për ambientet e postës, por edhe për banesat që ndodhen në të njëjtin objekt.

Pas njoftimit, forcat zjarrfikëse mbërritën në vendngjarje dhe ndërhynë për neutralizimin e flakëve, duke bërë të mundur shuarjen e plotë të zjarrit.

Sipas informacioneve paraprake, ngjarja nuk ka shkaktuar dëme materiale të konsiderueshme dhe nuk raportohet për persona të lënduar.

Shkaqet e rënies së zjarrit pritet të përcaktohen pas verifikimeve nga autoritetet përkatëse.