Londër – Një hetim i publikuar nga gazeta britanike “The Sun” pretendon se rrjete kriminale shqiptaro-britanike po përdorin një mënyrë të re për kontrabandimin e emigrantëve drejt Mbretërisë së Bashkuar, përmes jahteve luksoze që nisen nga vende të ndryshme të Europës.

Sipas hetimit, kjo metodë synon të shmangë kontrollet më të rrepta që aplikohen ndaj kalimeve me varka të vogla në Kanalin e La Manshit. Jahtet, sipas raportimit, ankorohen në marina më të vogla, duke e bërë më të vështirë zbulimin e lëvizjeve të tyre.

Gazetarët e “The Sun” pretendojnë se kanë kontaktuar përmes rrjeteve sociale persona që ofronin udhëtime me jaht drejt Britanisë. Sipas publikimit, një prej personave të kontaktuar ka kërkuar rreth 15 500 paund për një vend në një jaht që do të nisej nga Holanda dhe do të mbërrinte pranë brigjeve të Doverit.

Sipas bisedave të publikuara nga gazeta, personat e përfshirë kanë deklaruar se pagesa do të kryhej vetëm me para në dorë dhe se pasagjerët do të merreshin më pas nga persona të tjerë për t’u transportuar drejt Londrës.

Hetimi pretendon gjithashtu se një prej personave që ofronte udhëtimin ka deklaruar se jahti mund të transportonte një numër të kufizuar pasagjerësh dhe se kapitenët do të ishin shqiptarë. Ai ka pretenduar se një udhëtim i tillë ishte kryer më parë me sukses.

Autoritetet britanike kanë raportuar më herët për raste të përdorimit të mjeteve detare për kontrabandimin e emigrantëve drejt vendit. Në muajt e fundit janë regjistruar edhe operacione ku persona të dyshuar për përfshirje në këto rrjete janë arrestuar.

Sipas të dhënave të publikuara nga “The Sun”, një numër i konsiderueshëm personash që janë dëbuar më parë nga Britania janë identifikuar sërish në territorin britanik. Raportimi citon se shtetas shqiptarë përbëjnë një pjesë të konsiderueshme të këtyre rasteve.

Megjithatë, të dhënat dhe pretendimet e publikuara në hetimin mediatik mbeten pjesë e raportimit të gazetës, ndërsa verifikimi i plotë i çdo rasti i takon autoriteteve kompetente britanike.

Qeveria britanike ka deklaruar vazhdimisht se lufta kundër kontrabandës së emigrantëve dhe kontrolli i kufijve mbeten prioritete të politikës së saj të migracionit.