Tiranë – Shqipëria ka nënshkruar një marrëveshje për blerjen e sistemit të artilerisë BORAN 105 mm, të prodhuar nga kompania shtetërore turke e industrisë së mbrojtjes MKE, duke u renditur ndër vendet e para që pajisen me këtë teknologji ushtarake.

Sipas mediave të specializuara në fushën e mbrojtjes, kontrata përfshin gjashtë obusë të tërhequr BORAN, së bashku me një sasi municionesh, ndërsa Shqipëria bëhet vendi i tretë në botë që siguron këtë sistem, pas Bangladeshit dhe Maqedonisë së Veriut.

BORAN është projektuar si një sistem artilerie i lehtë dhe i lëvizshëm, i përshtatshëm për njësitë që kanë nevojë për fuqi zjarri, por që operojnë në terrene të vështira ose në zona ku transporti i mjeteve të rënda është i kufizuar.

Sistemi peshon rreth 1.7 ton dhe mund të transportohet edhe me mjete ajrore, përfshirë helikopterë ushtarakë, duke i dhënë forcave të reagimit të shpejtë mundësi për vendosje më të shpejtë në terren.

Sipas të dhënave të prodhuesit, BORAN mund të kalojë nga pozicioni i transportit në pozicion luftimi brenda një kohe shumë të shkurtër dhe ka një ritëm zjarri që varion nga 6 deri në 12 predha në minutë. Sistemi është i pajisur me teknologji moderne të kontrollit të zjarrit, të zhvilluar nga kompania turke ASELSAN, që përfshin orientimin me GPS, sensorë optikë, radar për matjen e shpejtësisë së predhës dhe kompjuter balistik.

Obusi ka një rreze veprimi deri në 17 kilometra me municione standarde, ndërsa me predha speciale me rreze të zgjeruar mund të arrijë deri në rreth 21 kilometra.

Blerja e këtij sistemi vjen në kuadër të përpjekjeve për modernizimin e kapaciteteve të Forcave të Armatosura të Shqipërisë dhe për forcimin e aftësive të mbështetjes me zjarr në terrene të ndryshme operacionale.

Pajisja me BORAN reflekton gjithashtu rritjen e rolit të industrisë turke të mbrojtjes në tregun ndërkombëtar dhe interesin e vendeve anëtare të NATO-s për të diversifikuar burimet e furnizimit me pajisje ushtarake.