Tiranë – Policia e Tiranës ka zbardhur ngjarjen e ndodhur mbrëmjen e së dielës në rrugën “Frosina Plaku”, ku disa persona u përfshinë në një konflikt me sende të forta dhe mjet prerës.

Si rezultat i veprimeve hetimore, në pranga janë vënë Luçiano Nurçja, 46 vjeç, Albert Lika, 44 vjeç dhe Enea Kurti, 23 vjeç, të dyshuar për veprën penale “Plagosja e rëndë me dashje”.

Ndërkohë, A.I., 33 vjeç, i cili ndodhet i shtruar në spital nën kujdesin e mjekëve, është proceduar penalisht në gjendje të lirë.

Policia ka shpallur në kërkim edhe E.L., 17 vjeç, i dyshuar për veprat penale “Plagosja e rëndë me dashje”, kryer në bashkëpunim, si dhe “Prodhimi, mbajtja, blerja apo shitja pa leje e armëve të ftohta”. Vijojnë kontrollet për lokalizimin dhe kapjen e tij.

Sipas njoftimit zyrtar, menjëherë pas marrjes së informacionit për konfliktin, Seksioni për Hetimin e Krimeve të Rënda, në bashkëpunim me Komisariatin e Policisë Nr. 2, ndërmori veprimet hetimore që çuan në dokumentimin e ngjarjes dhe identifikimin e personave të përfshirë.

Materialet procedurale i janë referuar Prokurorisë për vijimin e veprimeve hetimore.

Njoftimi i Policisë:

Tiranë/Dokumentohet ngjarja e ndodhur mbrëmjen e djeshme, në rrugën “Frosina Plaku”. U konfliktuan me sende të forta dhe mjet prerës, për motive të dobëta, vihen në pranga 3 shtetas, procedohet penalisht 1 shtetas dhe shpallet në kërkim 1 tjetër.

Seksioni për Hetimin e Krimeve të Rënda, në bashkëpunim me Komisariatin e Policisë Nr. 2, pas njoftimit të marrë se në hyrjen e një parkimi të një pallati, në rrugën “Frosina Plaku”, disa shtetas ishin konfliktuar me sende të forta dhe njëri prej tyre kishte përdorur mjet prerës, organizoi menjëherë punën për zbardhjen e rrethanave të ngjarjes dhe identifikimin e autorëve.

Si rezultat i veprimeve të shpejta hetimore, u dokumentua ngjarja dhe, në përfundim të veprimeve procedurale, u arrestuan në flagrancë shtetasit L. N., 46 vjeç, A. L., 44 vjeç dhe E. K., 23 vjeç, të dyshuar për veprën penale “Plagosja e rëndë me dashje”. Gjithashtu, u procedua në gjendje të lirë shtetasi A. I., 33 vjeç, i cili ndodhet në spital, nën kujdesin e mjekëve.

Po ashtu, u shpall në kërkim shtetasi E. L., 17 vjeç, i dyshuar për veprat penale “Plagosja e rëndë me dashje”, kryer në bashkëpunim, dhe “Prodhimi, mbajtja, blerja apo shitja pa leje e armëve të ftohta”. Vijon puna për kapjen e tij. Materialet procedurale iu referuan Prokurorisë, për veprime të metejshme