Frankfurt, Gjermani – Autoritetet gjermane kanë arrestuar në Aeroportin e Frankfurtit një 29-vjeçar shqiptar, i cili dyshohet se është pjesë e një organizate kriminale të përfshirë në një skemë mashtrimi me vlerë dhjetëra milionë euro.

Sipas raportimeve të mediave gjermane, arrestimi u krye të shtunën, menjëherë pas mbërritjes së të riut me një fluturim nga Dubai. Ai u ndalua nga Policia Federale gjermane sapo avioni u ul në aeroport.

Hetimet paraprake tregojnë se organizata e dyshuar u premtonte investitorëve fitime të larta përmes investimeve në asete të ndryshme financiare. Megjithatë, sipas autoriteteve, fondet e investuara nuk përdoreshin për qëllimet e deklaruara, por përvetësoheshin nga anëtarët e rrjetit kriminal.

Prokuroria gjermane vlerëson se dëmi ekonomik i shkaktuar në Gjermani arrin në dhjetëra milionë euro, ndërsa numri i plotë i personave të dëmtuar vijon të jetë objekt i hetimeve.

29-vjeçari ishte shpallur në kërkim me urdhër arresti nga Prokuroria e Përgjithshme e Dresdenit, si edhe nga autoritetet shqiptare, nën dyshimet për mashtrim në shkallë të gjerë.

Pas arrestimit, ai u paraqit përpara gjykatës kompetente, e cila vendosi masën e arrestit. Sipas autoriteteve, nëse shpallet fajtor në Shqipëri, ai mund të përballet me një dënim deri në 15 vjet burg.

Hetimet mbi veprimtarinë e organizatës kriminale dhe identifikimin e personave të tjerë të përfshirë janë në vijim.