Në orën 10:00, në Gjykatën e Posaçme Kundër Korrupsionit dhe Krimit të Organizuar (GJKKO), do të zhvillohet seanca e radhës e gjykimit në themel ndaj kryebashkiakut të Tiranës, Erion Veliaj.

Sipas informacioneve, Veliaj pritet të mos paraqitet edhe në këtë seancë, duke vijuar qëndrimin e tij kundër zhvillimit të procesit në kushtet e vendosjes në kafazin e qelqtë të sallës së gjyqit.

Në seancën e kaluar mungoi gjithashtu edhe avokati i tij mbrojtës, Plarent Ndreca. Ndërkohë, GJKKO vendosi për herë të tretë radhazi pezullimin e afateve të paraburgimit për Veliajn.

Gjykata ka rrëzuar gjithashtu kërkesat e mbrojtjes për transmetimin e drejtpërdrejtë të seancave dhe për zhvillimin e procesit pa përdorimin e kafazit të qelqtë.

Nga ana e tij, prokurori Ols Dado ka argumentuar se përdorimi i kafazit të qelqtë nuk përbën trajtim poshtërues, por është një masë që garanton zhvillimin normal dhe sigurinë e procesit gjyqësor.

Sa i takon kërkesës për transmetim "live", gjykata ka ritheksuar qëndrimin e saj të mëparshëm, duke lejuar praninë e kamerave vetëm në fillim të seancave dhe gjatë procedurave teknike.