SEATTLE – Belgjika ka siguruar kualifikimin në çerekfinalet e Kupës së Botës 2026, pasi mposhti me rezultatin bindës 4-1 përfaqësuesen e SHBA-së në ndeshjen e fazës së 1/8-ave.

Skuadra e drejtuar nga Rudi Garcia dominoi takimin që në minutat e para, duke kaluar në avantazh në minutën e 9-të. Charles De Ketelaere përfitoi nga një gabim në mbrojtjen amerikane dhe, pas asistit të Raskin, dërgoi topin në rrjetë për 1-0.

SHBA-ja reagoi në minutën e 31-të, kur goditja e Tillman u devijua nga Hans Vanaken, duke befasuar portierin belg dhe rikthyer baraspeshën. Megjithatë, festa e vendasve zgjati vetëm dy minuta. De Ketelaere realizoi golin e dytë personal pas një asistimi të Leandro Trossard, duke rikthyer avantazhin e Belgjikës.

Në pjesën e dytë, Vanaken u shlye për autogolin, duke shënuar golin e tretë pas një gabimi të portierit amerikan dhe një asistimi të De Ketelaere. Rezultati u vulos në minutat shtesë nga Romelu Lukaku, i cili shënoi për 4-1.

Me këtë fitore, Belgjika siguron një vend mes tetë skuadrave më të mira të Botërorit 2026. Në çerekfinale, belgët do të përballen me Spanjën, në ndeshjen e planifikuar të zhvillohet më 10 korrik, në orën 21:00.