SARANDË – Shërbimet e Policisë Kufitare kanë intensifikuar kontrollet dhe patrullimet përgjatë vijës bregdetare me qëllim garantimin e rendit dhe sigurisë detare gjatë sezonit turistik. Gjatë aksionit të fundit, autoritetet kanë bllokuar dy mjete lundruese të tipit Jet Ski, të cilat u konstatuan duke thyer hapur rregullat e lundrimit dhe duke rrezikuar jetën e qytetarëve.

Gjatë patrullimit në hapësirën ujore të Gjirit të Sarandës, efektivët evidentuan mjetin e parë që kishte shkelur perimetrin e sigurisë, duke hyrë mes pushuesve që po laheshin pranë bregut. Një shkelje e ngjashme u konstatua thuajse paralelisht edhe në zonën e Gjirit të Ksamilit, ku një tjetër mjet lundrues po lëvizte brenda zonës së ndaluar.

Përballë kësaj situate, shërbimet e Policisë Kufitare bënë menjëherë sekuestrimin e dy mjeteve dhe shoqërimin e tyre në Portin e Sarandës. Ndaj dy drejtuesve, të identifikuar me inicialet R. A. dhe R. P., u morën masa të rrepta ndëshkimore, duke u vendosur nga një masë administrative (gjobë) në vlerën e 500.000 lekëve të rinj për secilin.

Përmes një njoftimi zyrtar, Policia e Shtetit u ka bërë thirrje të gjithë përdoruesve të mjeteve lundruese argëtuese dhe subjekteve që menaxhojnë ato, që të respektojnë me rigorozitet të plotë korridoret e lundrimit dhe perimetrat e sigurisë ujoRe, duke garantuar se nuk do të ketë asnjë tolerim për shkelësit që vënë në rrezik jetën e pushuesve.