Nejmar i dha fund një epoke me fanellën e Brazilit në mënyrën më të dhimbshme, pasi "Seleçao" u eliminua nga Norvegjia në Botëror, në një ndeshje që pritet të mbetet e fundit e tij në këtë kompeticion.

Sulmuesi brazilian e nisi sfidën nga stoli, por u aktivizua gjatë pjesës së dytë në përpjekje për të ndryshuar fatin e takimit. Ai arriti të shënonte nga pika e bardhë e penalltisë, por goli nuk mjaftoi për të shmangur eliminimin e Brazilit përballë Norvegjisë së udhëhequr nga Erling Haland.

Para ekzekutimit të penalltisë, Nejmar pati një përplasje verbale me portierin norvegjez Nyland, i cili tentoi ta provokonte duke i thënë se do t’ia priste goditjen. Pasi e dërgoi topin në rrjetë, braziliani festoi përballë portierit, duke iu përgjigjur provokimeve, në vend që të nxitonte për rifillimin e lojës.

Megjithatë, atmosfera ndryshoi plotësisht pas vërshëllimës përfundimtare. Me eliminimin e Brazilit, Nejmar u rrëzua në fushë dhe shpërtheu në lot, i pushtuar nga emocionet dhe ndërgjegjësimi se ky ishte, me shumë gjasa, fundi i rrugëtimit të tij në Kupën e Botës me kombëtaren braziliane.

I rrethuar nga shokët e skuadrës, sulmuesi u përpoq të përballonte zhgënjimin e një mbylljeje të hidhur të një kapitulli të rëndësishëm të karrierës së tij me fanellën verdhejeshile.