Një ngjarje e rëndë ka ndodhur në zonën e "Ujit të Ftohtë" në Vlorë, ku një grua e moshuar ka pësuar lëndime serioze pasi është rrëzuar gjatë zbritjes nga autobusi i linjës urbane. Ngjarja është regjistruar përgjatë shëtitores së Lungomares, në momentin kur e moshuara ka humbur ekuilibrin në shkallët e mjetit dhe është përplasur me pjesën e betonit të trotuarit.

Qytetarët e shumtë që ndodheshin në vendngjarje kanë ndërhyrë menjëherë duke njoftuar Policinë dhe shërbimin e urgjencës mjekësore. Sipas të dhënave të para nga terreni, e moshuara ka pësuar hematoma dhe lëndime të dukshme në pjesën e kokës, në fytyrë si dhe në gjymtyrë.

Ajo është transportuar me urgjencë me ambulancë drejt Spitalit Rajonal të Vlorës, ku ndodhet nën kujdesin e mjekëve për ekzaminimet e plota, ndërsa policia po kryen veprimet e para procedurale për zbardhjen e rrethanave të aksidentit.