TIRANË – Grupi nismëtar për organizimin e Kuvendit Kombëtar të Protestës njoftoi se ka miratuar në mënyrë unanime platformën dhe kriteret e anëtarësimit, pas një mbledhjeje që, sipas organizatorëve, zgjati rreth pesë orë.

Përmes një reagimi publik, organizatorët bënë të ditur se emrat e personave që kanë kontribuar në proces nuk do të publikohen në këtë fazë, me argumentin se synojnë t’i mbrojnë nga "reprezaljet".

Në deklaratën e publikuar nga një prej organizatorëve, Klajdi Bello, thuhet se procesi i organizimit të Kuvendit do të vijojë dhe se qëllimi është përfaqësimi i protestuesve në këtë strukturë.

"Kuvendi, me hir a me pahir do të mblidhet. Protestuesit kanë nevojë për përfaqësim dhe ne jemi aty për këtë", thuhet në deklaratë.

Në të njëjtin reagim, organizatorët përsërisin edhe qëndrimin e tyre politik, duke kërkuar dorëheqjen e kryeministrit Edi Rama.

Deri më tani nuk ka pasur një reagim zyrtar nga institucionet shtetërore lidhur me deklaratat e grupit nismëtar apo me procesin e organizimit të këtij Kuvendi.