Ish-mbrojtësi i Bayern Munich dhe i Kombëtares së Francës, Willy Sagnol, ka vlerësuar në maksimum paraqitjet e Michael Olise, duke e cilësuar si futbollistin më të mirë në botë në këtë moment.

Në një intervistë për gazetën gjermane Bild, Sagnol deklaroi se mesfushori ofensiv i Bayern Munich është aktualisht përpara çdo lojtari tjetër dhe se duhet të jetë fituesi i "Topit të Artë" në fund të vitit.

"Olise është më i miri në botë, shumë përpara të gjithëve të tjerëve. Nëse ai nuk e fiton Topin e Artë, atëherë diçka seriozisht nuk shkon me futbollin", u shpreh ish-mbrojtësi francez.

Sagnol theksoi se një nga cilësitë më të mëdha të 24-vjeçarit është loja në funksion të skuadrës, duke vlerësuar faktin se ai nuk udhëhiqet nga statistikat personale, por nga kontributi për ekipin.

Ai e krahasoi Olise me legjendën franceze Zinedine Zidane, ndërsa shtoi se, ndryshe nga Lionel Messi dhe Cristiano Ronaldo, të cilët sipas tij kanë pasur edhe fokus te statistikat individuale, lojtari i Bayern Munich vendos ekipin mbi gjithçka.

Edhe pse nuk ka shënuar ende në Kupën e Botës 2026, Michael Olise ka qenë një nga protagonistët e Francës, duke regjistruar gjashtë asistime në katër ndeshje dhe duke u kthyer në një nga lojtarët më të spikatur të turneut.