TIRANË – Protesta e 34-t radhazi e zhvilluar në kryeqytet ka vijuar me fjalime nga pjesëmarrës të ndryshëm, ku ndër to ka spikatur edhe një vajzë e mitur që iu drejtua protestuesve nga podiumi.

Në fjalën e saj, ajo kërkoi lirimin e personave të arrestuar gjatë protestës së një dite më parë dhe bëri thirrje për një “Shqipëri të lirë”.

E vogla akuzoi policinë për dhunë ndaj protestuesve, ndërsa përsëriti kërkesat e tubimit për dorëheqjen e kryeministrit Edi Rama.

"Protestoj për një Shqipëri të lirë, dhe jo për një Shqipëri të varfër që shitet. Policia rrahu protestuesit dje dhe i dërgoi në burg.

Po ne nuk do ta lëmë me kaq sepse ne e duam Shqipërinë nuk duam ta shesim atë. Liroi çunat! Rama jepe dorëheqjen!”, tha ajo.

Protesta, e cila po zhvillohet prej disa javësh në Tiranë, është shoqëruar me thirrje të vazhdueshme për dorëheqjen e qeverisë dhe lirimin e personave të ndaluar gjatë tubimeve të mëparshme.