Kursi i këmbimit të lekut ndaj euros ka regjistruar një rënie të ndjeshme gjatë ditës së sotme, duke zbritur për herë të parë në histori nën nivelin e 94 lekëve.

Sipas kursit zyrtar të publikuar nga Banka e Shqipërisë, një euro u këmbye sot me 93.88 lekë, duke shënuar një rënie prej 0.19 lekësh krahasuar me ditën e mëparshme. Kjo përbën rënien më të madhe ditore të euros gjatë këtij viti.

Në raport me fillimin e vitit, monedha e përbashkët europiane është zhvlerësuar me më shumë se 3%, ose me mbi 3 lekë.

Mesatarisht, gjatë periudhës nga 3 janari deri më 3 korrik, një euro është këmbyer me rreth 95.8 lekë, ndërsa mesatarja e vitit 2025 ishte 97.8 lekë.

Nëse krahasohet me mesataren e vitit 2015, kur euro këmbehej me rreth 140 lekë, monedha europiane është zhvlerësuar në Shqipëri me rreth 40%, ose me më shumë se 46 lekë.

Sipas aktorëve të tregut, rënia e euros lidhet me një sërë faktorësh, mes tyre edhe flukset e parave informale që hynë në vend pas vitit 2016 dhe që u orientuan kryesisht drejt sektorit të ndërtimit.

Pas vitit 2022, një ndikim gjithnjë e më i madh ka ardhur edhe nga turizmi, ndërsa hyrjet e shtetasve të huaj në vend në vitin 2025 tejkaluan shifrën e 12 milionëve.

Rënia e regjistruar ditët e fundit lidhet kryesisht me faktorët sezonalë. Megjithatë, aktorët e tregut thonë se situata paraqitet disi kaotike dhe është e vështirë të kuptohet qartë se çfarë po ndodh në tregun valutor.

Zhvlerësimi i euros ka goditur rëndë eksportuesit, por edhe sektorin e turizmit, i cili një pjesë të madhe të të ardhurave i arkëton në euro. Po ashtu, rënia e monedhës europiane ka ulur vlerën e remitancave që emigrantët dërgojnë në Shqipëri.

Nga ana tjetër, kjo situatë ka qenë e favorshme për importuesit, të cilëve u nevojiten më pak euro për të blerë të njëjtën sasi mallrash. Përfitues është edhe buxheti i shtetit, pasi paguan më pak për borxhin e jashtëm, si dhe qytetarët shqiptarë që udhëtojnë jashtë vendit për pushime.