TIRANË – Qytetarë dhe mbështetës të protestës u mblodhën këtë të premte në Tiranë në protestën e 34-t radhazi, duke kërkuar dorëheqjen e kryeministrit Edi Rama.

Tubimi nisi në sheshin "Skënderbej", ndërsa më pas protestuesit marshuan drejt godinës së Kryeministrisë, ku u mbajtën fjalime dhe u përsëritën kërkesat e tyre.

Organizatorët u bënë thirrje qytetarëve nga e gjithë Shqipëria, si edhe shqiptarëve që jetojnë në diasporë, t’i bashkohen protestës, duke theksuar se objektivi i tyre mbetet largimi i kryeministrit nga detyra. Sipas tyre, protestat do të vijojnë edhe në ditët në vazhdim deri në realizimin e kësaj kërkese.

Gjatë marshimit, protestuesit brohoritën slogane kundër qeverisë, mes tyre "Shqipëria nuk shitet", "Rama jepe dorëheqjen", "Lironi çunat" dhe kërkuan lirimin e personave të arrestuar gjatë protestës së mëparshme. Ata deklaruan se do të vazhdojnë mobilizimin për pjesëmarrje sa më të gjerë në tubimet e ardhshme.

Grupi nismëtar për organizimin e Kuvendit Kombëtar të Protestës njoftoi sakaq se ka miratuar në mënyrë unanime platformën dhe kriteret e anëtarësimit pas një mbledhjeje pesëorëshe.

Organizatorët njoftuan se emrat e kontribuuesve do të mbahen të fshehtë për t’i mbrojtur, sipas tyre, nga reprezaljet.

Ata thanë se procesi për mbledhjen e Kuvendit do të vijojë dhe se protestuesit duhet të kenë përfaqësimin e tyre.

“Vëllezër e motra, dëshirojmë t’ju informojmë se pas një takimi i cili zgjati 5 orë të plota, Grupi Nismëtar për organizimin e Kuvendit Kombëtar të Protestës, miratoi në unanimitet platfomën dhe kriteret e anëtarësimit.

Na u nevojitën 34 ditë për të arritur në këtë pikë, ku kemi pasur pafund shkopinj nën rrota, por Zoti është më i madh dhe është me ne!

Mirënjohje pafund për kontribuesit (emrat nuk i themi sot për ti mbrojtur nga raprezaljet, por të mirën s’ua harrojmë).

Kuvendi, me hir a me pahir do të mblidhet!

Protestuesit kanë nevojë për përfaqësim dhe ne jemi aty për këtë. Kjo gjë nuk diskutohet!

Siç është e padiskutueshme kërkesa dhe vullneti i Sovranit për dorëheqjen e Edi Ramës!”, deklaroi një prej nismëtarëve, Klajdi Bello.