ROMË – Autoritetet italiane po hetojnë vjedhjen e 80 shisheve me fentanil nga Spitali Izraelit në Romë, një incident që ka ngritur shqetësime për mundësinë e përfundimit të substancës në tregun e paligjshëm të drogës.

Fentanili është një opioid sintetik shumë i fuqishëm, i përdorur në mjekësi si analgjezik për trajtimin e dhimbjeve të forta. Megjithatë, ai konsiderohet gjithashtu një nga substancat narkotike më të rrezikshme, për shkak të potencialit të lartë për mbidozë dhe numrit në rritje të vdekjeve të lidhura me përdorimin e tij të paligjshëm.

Sipas mediave italiane, sasia e vjedhur mund të përkthehet në deri në 20 mijë doza, duke rritur frikën se droga mund të kanalizohet në rrjetet e trafikut të paligjshëm.

Shishet ruheshin në një kasafortë brenda spitalit dhe hetuesit dyshojnë se bëhet fjalë për një vjedhje të organizuar. Rasti u denoncua nga vetë stafi i spitalit, ndërsa po verifikohet edhe rrethi i personave që kishin akses në kasafortën ku ruheshin medikamentet.

Çështja ka marrë vëmendjen e qeverisë italiane. Sipas burimeve zyrtare, në Presidencën e Këshillit të Ministrave është zhvilluar një mbledhje urgjente për të vlerësuar situatën dhe masat që do të ndërmerren.

Burime qeveritare kanë shprehur shqetësim për mënyrën se si është administruar siguria e substancave të kontrolluara, duke theksuar nevojën për forcimin e protokolleve të ruajtjes dhe monitorimit të medikamenteve me rrezik të lartë.