ELBASAN – Një stuhi e fortë shiu, e shoqëruar me breshër dhe erëra të fuqishme, përfshiu këtë të premte qarkun e Elbasanit, duke shkaktuar dëme në bujqësi dhe probleme në qarkullimin rrugor.

Reshjet intensive sollën grumbullim uji në disa akse, duke vështirësuar lëvizjen e automjeteve dhe këmbësorëve, ndërsa erërat e forta krijuan situata problematike në zona të ndryshme të qarkut.

Sipas raportimeve paraprake, moti i keq ka dëmtuar kultura bujqësore në disa zona, ndërsa breshëri ka prekur veçanërisht sipërfaqe të mbjella, duke shkaktuar humbje për fermerët.

Stuhia nuk ka prekur vetëm qytetin e Elbasanit, por edhe bashki të tjera të qarkut, ku janë raportuar dëme të konsiderueshme në sektorin bujqësor.

Autoritetet u kanë bërë thirrje qytetarëve të shmangin lëvizjet e panevojshme dhe të tregojnë kujdes gjatë qarkullimit, pasi kushtet atmosferike vijojnë të mbeten të paqëndrueshme.