SHKODËR – Policia e Shkodrës ka zbardhur grabitjen me armë të ndodhur rreth tre javë më parë ndaj një çifti turistësh gjermanë në fshatin Domen, duke arrestuar një 16-vjeçar të dyshuar si një nga autorët.

Operacioni policor i koduar "Rest Time" çoi në prangosjen e të miturit, ndërsa dy bashkëpunëtorë të dyshuar, të moshave 20 dhe 27 vjeç, po hetohen në gjendje të lirë. Një person i katërt është shpallur në kërkim.

Sipas hetimeve, ngjarja ka ndodhur më 9 qershor 2026, gjatë natës, në aksin rrugor Domen–Postribë, ku katër të dyshuarit, nën kërcënimin e një arme zjarri, u kanë marrë 500 euro dy shtetasve gjermanë, bashkëshortë, të cilët ndodheshin në automjetin e tyre.

Policia bën të ditur se identifikimi i autorëve u bë pas veprimeve intensive hetimore të kryera nga Sektori për Hetimin e Krimeve të Rënda në Drejtorinë Vendore të Policisë Shkodër.

Ndërkohë, vijon puna për lokalizimin dhe arrestimin e personit të shpallur në kërkim, si edhe për dokumentimin e plotë të ngjarjes.

Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.

Njoftimi i Policisë:

" Zbardhen rrethanat e vjedhjes së një shume parash, 2 shtetasve të huaj (bashkëshortë), me anë të kanosjes me armë zjarri, rreth 3 javë më parë, në fshatin Domen. Vihet në pranga 1 shtetas, procedohen në gjendje të lirë 2. Shpallet në kërkim bashkëpunëtori i tyre. Në vijim të punës së pandërprerë hetimore për zbardhjen e vjedhjeve, strukturat hetimore të Drejtorisë Vendore të Policisë Shkodër finalizuan operacionin e koduar “Rest time”.

Në kaudër të këtij operacioni, specialistët e Sektorit për Hetimin e Krimeve të Renda arrestuan një 16-vjeçar, referuan materialet në Prokurori ku nisi procedimi në gjendje të lirë për 2 shtetas, të moshave 27 dhe 20 vjeç, si dhe shapllën në kërkim 1 shtetas. Nga veprimet hetimore dyshohet se më datë 09.06.2026, gjatë natës, në aksin rrugor “Domen-Postribë”, 16-vjeçari, në bashkëpunim me 3 shtetasit e tjerë, iu ka marrë 500 euro, 2 shtetasve gjermanë (bashkëshortë), të cilët po qëndronin në automjetin e tyre. Vijon puna për kapjen e shtetasit në kërkim dhe për dokumentimin e plotë ligjor të këtij rasti. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme" ,njofton Policia.