Tiranë – Kryeministri Edi Rama mori pjesë në ceremoninë e inaugurimit të Shkollës Kombëtare të Fluturimit, të cilën e cilësoi një projekt strategjik për modernizimin e Forcave të Armatosura dhe forcimin e kapaciteteve të aviacionit ushtarak shqiptar.

Gjatë fjalës së tij, Rama tha se projekti, i cili sipas tij u prit fillimisht me skepticizëm dhe kritika, është tashmë një realitet që hap perspektiva të reja për trajnimin e pilotëve shqiptarë dhe të vendeve partnere.

Kryeministri falënderoi kompaninë Elbit Systems, duke e cilësuar një nga liderët botërorë në teknologjinë ushtarake, për mbështetjen dhe ekspertizën e ofruar në ngritjen e shkollës.

Sipas Ramës, shkolla do të jetë e hapur jo vetëm për stërvitjen dhe certifikimin e pilotëve shqiptarë, por edhe për pilotët e rinj nga vendet anëtare të NATO-s në rajon, duke nisur me Kosovën.

"Ministri i Mbrojtjes është ngarkuar të diskutojë me homologun e Kosovës mundësinë e trajnimit dhe certifikimit të pilotëve të ardhshëm të Forcës së Sigurisë së Kosovës, si edhe me vendet e tjera fqinje anëtare të NATO-s", deklaroi Rama.

Ai theksoi se interesi i të rinjve për t’iu bashkuar Forcave të Armatosura është rritur ndjeshëm, duke bërë që përzgjedhja e kandidatëve të jetë më konkurruese se në të kaluarën.

Në fjalën e tij, kryeministri vlerësoi gjithashtu transformimin e Forcave të Armatosura gjatë dekadës së fundit, duke deklaruar se sot ato janë ndër më të mirëpaguarat në rajon, ndërsa objektivi i qeverisë është që pagat e efektivëve të arrijnë mesataren e vendeve të NATO-s në kuadër të vizionit "Shqipëria 2030".

Duke folur për kapacitetet ajrore, Rama deklaroi se të gjithë helikopterët e Forcave Ajrore janë aktualisht operacionalë dhe të gatshëm për sezonin veror, kur rreziku nga zjarret është më i lartë.

Ai bëri të ditur se, me aktin e fundit normativ të qeverisë, flotës ekzistuese do t’i shtohen edhe helikopterë të tjerë Black Hawk, të siguruar nga Shtetet e Bashkuara të Amerikës.

"Shqipëria do të bëhet vendi me një nga kapacitetet më të spikatura të helikopterëve në rajon, si për misionet ushtarake, ashtu edhe për përballimin e emergjencave civile", u shpreh Rama.