Kampionati shqiptar i futbollit do të pësojë ndryshime të rëndësishme strukturore për sezonin e ri. Federata Shqiptare e Futbollit ka vendosur të ndryshojë rregulloren e garës, duke pasur si synim kryesor rritjen e konkurrencës, mbrojtjen e elementit vendas dhe zhvillimin e futbollistëve të rinj.

Ndryshimi më i madh prek lojtarët e huaj, duke rikthyer kufizimet që u hoqën më parë. Pas një sezoni ku klubet patën liri të plotë për të aktivizuar lojtarë të huaj pa limit, eksperimenti nuk solli rritjen e pritshme të cilësisë. Për këtë arsye, rregullat e reja përcaktojnë se në fushën e lojës do të lejohet aktivizimi i maksimumi 7 futbollistëve të huaj njëkohësisht, ndërsa në listën totale të federimit, një klub nuk mund të regjistrojë më shumë se 9 lojtarë të huaj.

Kosova dhe Maqedonia e Veriut nuk quhen "të huaj"

Për të mos penalizuar lëvizjen e lojtarëve shqiptarë në rajon, FSHF ka vendosur një përjashtim të rëndësishëm në rregullore. Futbollistët që vijnë nga Kosova dhe Maqedonia e Veriut nuk do të llogariten si lojtarë të huaj në kuotën e përcaktuar, duke ua lehtësuar klubeve të Superiores regjistrimin dhe aktivizimin e tyre pa konsumuar vendet e limituara.

Hapësirë e detyrueshme për talentet e reja

Një tjetër pikë kthese në këtë reformë është rregulli strikt që lidhet me lojtarët e akademive. Klubet e elitës do të jenë të detyruara me rregullore që në çdo ndeshje të aktivizojnë të paktën një futbollist të moshës nën 18 vjeç (U-18) për minimumi 45 minuta lojë.

Sipas autoriteteve drejtuese të futbollit, këto masa emergjente synojnë t’u japin më shumë hapësirë dhe minuta talenteve vendase, duke detyruar klubet të investojnë te të rinjtë për të garantuar rritjen e cilësisë së kampionatit dhe furnizimin e ekipeve kombëtare në afatgjatë. Këto ndryshime vijnë në vazhdën e reformave të mëparshme të nisura nga FSHF për modernizimin e plotë të formatit të garës në vend.