GJERMANI – Eliminimi i parakohshëm i kombëtares së Gjermanisë në fazën e 1/16-ve të Kupës së Botës 2026 ka sjellë një lëkundje të fortë dhe ndryshime të menjëhershme në stolin e "Pancerave". Federata Gjermane e Futbollit (DFB) ka zyrtarizuar këtë të premte ndërprerjen e bashkëpunimit dhe largimin e trajnerit Julian Nagelsmann.

Tekniku 38-vjeçar mori përgjegjësinë e plotë për dështimin dhe rezultatin zhgënjyes në Botëror, duke deklaruar se kombëtarja gjermane ka nevojë imediate për një epokë dhe fillim të ri. Në mesazhin e tij të lamtumirës, Nagelsmann gjeti rastin të falënderonte lojtarët, stafin teknik dhe tifozët për mbështetjen e dhënë gjatë gjithë periudhës që ai udhëhoqi ekipin përfaqësues.

Klopp në “pole-position”, drita jeshile nga klauzola e Red Bull

Menjëherë pas zyrtarizimit të shkarkimit, vëmendja e të gjithë opinionit sportiv është përqendruar te pasuesi i tij në stol, ku emri më i lakuar dhe i dëshiruar është ai i Jurgen Klopp. Sipas raportimeve të fundit nga mediat gjermane, ish-timonieri legjendar i Liverpoolit ka dhënë sinjale të qarta se është i gatshëm të marrë drejtimin e "pancerave", sapo Federata t’i paraqesë një ofertë zyrtare në tavolinë.

Klopp, i cili aktualisht mban postin e rëndësishëm si drejtues global i futbollit në kompaninë Red Bull, raportohet se ka një avantazh të madh ligjor. Në kontratën e tij aktuale ekziston një klauzolë specifike e quajtur "klauzola e kombëtares", e cila i mundëson largimin e menjëhershëm pa penalizme, në rast se merr një ftesë zyrtare nga Federata Gjermane e Futbollit.

Tashmë gjithçka mbetet në dorën e drejtuesve të DFB-së për të arritur akordin financiar me një nga trajnerët më të suksesshëm të dekadës së fundit, duke i besuar atij misionin e vështirë për të rikthyer Gjermaninë në elitën dhe majat e futbollit botëror.