TIRANË – Kryetari i Bashkisë së Tiranës, Erion Veliaj, ka mbërritur mesditën e kësaj të premteje në ambientet e Gjykatës Administrative, ku pritet të zhvillohet seanca e radhës gjyqësore në ballafaqimin ligjor me prokurorin e Prokurorisë së Posaçme (SPAK), Ols Dado.

Kjo seancë vjen pas shtyrjes së herës së kaluar, vendim i cili u mor nga togat e zeza për t’u dhënë kohën e mjaftueshme palëve ndërgjyqëse që të njiheshin zyrtarisht me kërkesën e depozituar nga shoqata “Asociacioni Kombëtar i Medias dhe Drejtësisë”. Kjo e fundit ka kërkuar ndërhyrjen në proces për t’u përfshirë si palë e tretë në gjykim.

Objekti i kësaj padie të ngritur nga kryebashkiaku Veliaj është anulimi dhe shpallja e pavlefshme e dekretit të emërimit të Ols Dados si prokuror, i firmosur në vitin 2008 nga Presidenti i Republikës së asaj kohe, Bamir Topi. Sipas pretendimeve të paditësit, emërimi i Dados në atë periudhë është kryer në shkelje të ligjit, pasi ai nuk kishte përfunduar Shkollën e Magjistraturës. Për këtë arsye, në këtë proces gjyqësor, palë e paditur krahas prokurorit është edhe Institucioni i Presidentit të Republikës.

Nga ana tjetër, organizata që kërkon të bëhet pjesë e gjykimit argumenton se çështja mbart një interes tejet të lartë publik, pasi prek drejtpërdrejt integritetin e sistemit të drejtësisë në vend, që përbën edhe një nga shtyllat kryesore të veprimtarisë së kësaj shoqate. Seanca e sotme pritet të vendosë nëse Gjykata Administrative do ta pranojë legjitimitetin e shoqatës si palë e tretë për të vijuar më pas me shqyrtimin e fthelluar të provave.