POGRADEC – Një task-forcë e përbashkët e përbërë nga përfaqësues të Agjencisë Kombëtare të Bregdetit, Bashkisë Pogradec dhe Policisë së Shtetit ka nisur këtë të premte një operacion të gjerë inspektimi përgjatë vijës bregliqenore të Pogradecit. Qëllimi i këtij aksioni është monitorimi strikt i zbatimit të lejeve për stacionet e plazhit, si dhe garantimi i sipërfaqeve të përcaktuara me ligj si plazhe publike.

Drejtori i Agjencisë Kombëtare të Bregdetit, Shpëtim Çiku, bëri të ditur se gjatë kontrolleve të para të terrenit nuk janë konstatuar problematika apo shkelje flagrante. Ai nënvizoi se këto inspektime do të vijojnë në mënyrë të pandërprerë gjatë gjithë sezonit turistik për të parandaluar çdo tentativë për zënie të paligjshme të hapësirave publike apo mosrespektim të kritereve të lejeve të miratuara.

Nga ana tjetër, Drejtoresha e Taksave dhe Tarifave Vendore në Bashkinë Pogradec, Enjela Karafili, zbardhi ndarjen specifike të vijës liqenore për këtë vit, duke specifikuar se pjesa më e madhe e saj do të jetë e aksesueshme pa pagesë nga qytetarët dhe turistët.

"Këtë sezon, mbi 60% e sipërfaqes bregliqenore është lënë në funksion të plazheve publike, ndërsa vetëm rreth 40% është e destinuar për stacionet private të menaxhuara nga operatorët. Kontrollet tona do të zhvillohen çdo javë për të garantuar respektimin milimetrik të kësaj ndarjeje dhe për të shmangur çdo abuzim nga subjektet private," u shpreh Karafili.

Përveç verifikimit të dokumentacionit dhe matjes së sipërfaqeve të shtretërve të plazhit, task-forca është ndalur me imtësi edhe te zbatimi i rregullave të sigurisë në ujë. Ndër pikat kryesore të kontrolluara ishin prania e vrojtuesve të certifikuar të plazhit në kullat e vrojtimit, vendosja e saktë e sinjalistikës ujore, kufizimi i zonave ku lejohen mjetet lundruese përmes bovave, si dhe shënimi i qartë i zonave të thellësisë, me synim garantimin e jetës dhe sigurisë së pushuesve përgjatë muajve të verës.