TIRANË – Drejtuesi i Prokurorisë së Posaçme (SPAK), Klodian Braho, vlerësoi rolin e Policisë së Shtetit si një partner të pazëvendësueshëm në luftën kundër krimit të organizuar dhe korrupsionit, duke konfirmuar se referimet penale nga ky institucion kanë pësuar rritje gjatë vitit 2025. Megjithatë, gjatë raportimit të tij në Komisionin e Ligjeve, kreu i SPAK nënvizoi se struktura që ai drejton pret një angazhim ende më proaktiv dhe kërkoi forcimin e pavarësisë operacionale të Byrosë Kombëtare të Hetimit (BKH).

Braho argumentoi se SPAK dhe BKH duhet të kenë kapacitetet e veta logjistike dhe taktike për të kryer operacione të plota, pa pasur nevojë të varen në çdo rast nga strukturat e tjera mbështetëse.

“Partner i pazëvendësueshëm, por presim më shumë”

Në fjalën e tij përpara deputetëve, kreu i SPAK u shpreh me konsideratë për punën e efektivëve të policisë në terren, duke pranuar se suksesi i prokurorisë speciale është i lidhur ngushtë me punën e tyre, pavarësisht rasteve të izoluara të shkeljes së ligjit brenda rradhëve të uniformave blu.

Klodian Braho: "Gjatë vitit 2025 referimet penale të policisë janë rritur në SPAK, dhe ky trend pozitiv po vijon edhe gjatë këtij viti. Kemi vlerësimin më të madh për policinë, për ata njerëz që punojnë me përkushtim. Si në çdo institucion tjetër, ndonjëri prej tyre mund të ketë edhe probleme me ligjin. Policia është partneri ynë i pazëvendësueshëm dhe suksesi ynë është i lidhur me ta, por unë personalisht dhe struktura që drejtoj presim më shumë nga policia dhe besoj se ka vend për më shumë."

Mungesa e infrastrukturës dhe pavarësia e BKH-së

Një pikë kyçe e raportimit të Brahos ishte nevoja për të rritur autonominë e plotë të BKH-së në kryerjen e arrestimeve dhe kontrolleve të banesave, duke evidentuar se aktualisht pengesat kryesore vijnë nga mungesa e një baze të dedikuar materiale e taktike.

"Veprimet që mund të kryejë BKH, qoftë për arrestime personash apo për kontrolle territori, janë veprime që ligji ia lejon plotësisht. Pengesat në disa raste mund të vijnë vetëm për shkak të mungesës së një infrastrukture të dedikuar operacionale dhe taktike. Në pikëpamjen time dhe të drejtorit të BKH-së, pavarësisht bashkëpunimit të shkëlqyer me institucionet e tjera, mendoj se SPAK duhet të ketë një pavarësi operacionale. Nuk duhet të vargemi gjithmonë nga strukturat e tjera," deklaroi kreu i Prokurorisë së Posaçme.

Në mbyllje, Braho saktësoi se ky propozim nuk synon të zëvendësojë apo të zbehtë rolin e Policisë së Shtetit, por të garantojë që SPAK të jetë i aftë të përmbyllë vetë të gjithë ciklin e veprimeve hetimore në çështje të një rëndësie të veçantë, duke ndjekur kështu modelet dhe praktikat më të mira të institucioneve homologe në vendet e Bashkimit Europian dhe SHBA.