TIRANË – Detaje të reja dhe mjaft interesante kanë dalë në dritë nga lista e personave të arrestuar nga Policia e Tiranës, pas përplasjeve të dhunshme të regjistruara gjatë protestës së djeshme përpara Kuvendit.

Mes 19 të prangosurve, një histori e veçantë njerëzore lidhet me shtetasin Admir Tërshalla, me profesion programues. Sipas informacioneve paraprake, ky ndalim ka përkuar me një nga momentet më të rëndësishme të jetës së tij private. I riu kishte planifikuar që pikërisht ditën e sotme (të premten, 3 korrik) të zhvillonte ceremoninë e tij të martesës.

Dasma pezull, pritet vendimi i Gjykatës

Në vend të festimeve dhe altarit, Tërshalla po e kalon këtë ditë në ambientet e paraburgimit. Ai, së bashku me të arrestuarit e tjerë, po mbahet në komisariat në pritje të përfundimit të procedurave ligjore.

Autoritetet njoftojnë se brenda afatit ligjor prej 72 orësh, dosja e tij dhe e protestuesve të tjerë do t’i kalojë Gjykatës për vlerësimin e masës së sigurisë, ku do të përcaktohet nëse do të hetohet në gjendje të lirë apo nën masa shtrënguese.

Kujtojmë se nga tubimi i djeshëm mbetën të plagosur 15 punonjës policie, ndërsa Policia e Shtetit ka referuar materialet në Prokurori për disa vepra penale, përfshirë "Goditje për shkak të detyrës" dhe "Shkatërrim të pronës".