DIVJAKË – Një operacion masiv antikanabis i shtrirë në tokë dhe nga ajri me dronë, i koduar "Koordinimi", ka çuar në zbulimin e një ambienti të përshtatur për tharjen dhe përpunimin e lëndëve narkotike në Divjakë. Gjatë këtij aksioni, Policia e Shtetit ka sekuestruar një sasi prej 44 kilogramësh kanabis sativа dhe ka asgjësuar mbi 1400 rrënjë.

Për shkak të vendndodhjes së kësaj "fabrike" në zonë shtetërore e të mbrojtur, blutë kanë vënë nën hetim për "Shpërdorim detyre" tre zyrtarë të Administratës Rajonale të Zonave të Mbrojtura (AdZM) në qarkun Fier.

Zyrtarët nën hetim dhe rolet e tyre

Materialet procedurale i kanë kaluar prokurorisë, e cila ka nisur procedimin në gjendje të lirë për shtetasit:

Edison Toromëni, 33 vjeç – me detyrë Përgjegjës Sektori në AdZM Fier.

Festim Hoxha, 37 vjeç – me detyrë Specialist Menaxhimi.

Gazmor Allka, 53 vjeç – me detyrë Roje.

Detajet e operacionit “Koordinimi”

Aksioni i finalizuar nga Sektori për Hetimin e Narkotikëve në DVP Fier në bashkëpunim me Komisariatin e Divjakës, u përqendrua në vendin e quajtur “Rezervuari i Divjakës”. Në këtë hapësirë publike, efektivët konstatuan fillimisht 1426 bimë narkotike kanabis të kultivuara, ku një pjesë u asgjësua me anë të djegies dhe pjesa tjetër u mor si provë materiale.

Më pas, brenda ambientit të përshtatur si magazinë/tharëse, u gjetën dhe u sekuestruan:

37 kilogramë kanabis në proces tharjeje.

7 kilogramë kanabis i përgatitur në formë boçesh.

DVP Fier: "Vijon puna intensive nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Fier, për identifikimin, lokalizimin dhe kapjen e autorëve të vërtetë të kultivimit të kësaj sasisë së drogës."

Njoftimi i plotë:

Vijojnë intensivisht kontrollet në territor dhe në ambiente të mbyllura, për parandalimin dhe goditjen e kultivimit të bimëve narkotike.

Zbulohet në Divjakë, një ambient i përshtatur për tharjen dhe përpunimin e bimëve narkotike. Sekuestrohen 44 kilogramë bimë narkotike kanabis, në formë boçesh/në proces tharjeje.

Gjithashtu, gjatë operacionit, u konstatuan të kultivuara 1426 bimë narkotike kanabis. Një pjesë e tyre u asgjësuan në vend, ndërsa pjesa tjetër u sekuestruan në cilësinë e provës materiale.

Si rezultat i kontrolleve intensive në territorin e qarkut Fier, nga toka dhe nga ajri, me dronë, shërbimet e Drejtorisë Vendore të Policisë Fier, në bashkëpunim me shërbimet e Komisariatit të Policisë Divjakë, bazuar dhe në informacionet e siguruara në rrugë operative, kanë finalizuar operacionin e koduar “Koordinimi”.

Gjatë operacionit, në vendin e quajtur “Rezervuari i Divjakës”, në një tokë shtetërore, u gjet një ambient i përshtatur për tharjen dhe përpunimin e bimëve narkotike. Në këtë ambient u gjetën 37 kilogramë lëndë e dyshuar narkotike kanabis në proces tharjeje dhe 7 kilogramë lëndë e dyshuar narkotike kanabis në formë boçesh. Lënda narkotike u sekuestrua në cilësinë e provës materiale, me qëllim kryerjen e ekspertimit.

Në vijim të veprimeve procedurale, specialistët e Sektorit për Hetimin e Narkotikëve në DVP Fier referuan materialet në Prokurori ku nisi procedimi në gjendje të lirë për veprën penale “Shpërdorimi i detyrës”, për 3 punonjës të Administratës Rajonale të Zonave të Mbrojtura në qarkun Fier, shtetasit: -E. T., 33 vjeç, me detyrë përgjegjës sektori, F. H., 37 vjeç, me detyrë specialist menaxhimi dhe G. A., 53 vjeç, me detyrë roje.

Vijon puna, në drejtimin e Prokurorisë së Fierit, për identifikimim dhe kapjen e autorit/ëve të kultivimit të bimëve narkotike.

Drejtoria Vendore e Policisë Fier vijon kontrollet intensive nga ajri, me dronë, dhe nga toka, me qëllim parandalimin dhe goditjen e veprimtarisë kriminale të kultivimit të bimëve narkotike.

Policia e Shtetit inkurajon qytetarët që të denoncojnë çdo rast paligjshmërie, në njësitë e Policisë ose në numrin pa pagesë 112.