ELBASAN – Ministri i Brendshëm, Besfort Lamallari, i shoqëruar nga Drejtori i Përgjithshëm i Policisë së Shtetit, Skënder Hita, inspektuan këtë të premte përfundimin e punimeve për Axhornimin dhe rikonstruksionin e godinave të Drejtorisë Vendore të Policisë në Elbasan. Gjatë një takimi të zgjeruar me strukturat drejtuese lokale, kreu i dikasterit të Brendshëm vuri theksin te rëndësia e standardeve të reja të punës dhe modernizimi i infrastrukturës, ndërsa u ndal gjerësisht edhe te tensionet e regjistruara në protestën e një dite më parë përpara Parlamentit.

Lamallari deklaroi prerazi se Policia e Shtetit e ka kryer detyrën e saj në mënyrë të përsosur në menaxhimin e tubimit, duke nënvizuar se dhuna ka nisur fillimisht nga një grup personash, të cilët ai i cilësoi si vandalë. Ministri bëri një ndarje të qartë mes të drejtës kushtetuese për të protestuar dhe akteve të paligjshme të dhunës ndaj uniformave blu dhe përfaqësuesve të medias.

"Ndodhem në Elbasan për të inspektuar ambientet moderne të Policisë së Shtetit për të garantuar shërbime më të mira ndaj qytetarëve. Standarde të tilla infrastrukturore do të kemi në të gjithë vendin. Lidhur me ngjarjet e fundit, janë dy momente që dua të veçoj bazuar strikt mbi fakte. Dhuna në bulevard nisi me sulme ndaj punonjësve të Policisë së Shtetit. Protesta është e ligjshme dhe tregon kulturë të lartë demokratike, por nuk mund të goditen punonjësit e policisë e as gazetarët. Ne kishim një thirrje nga Unioni i Gazetarëve për mbrojtjen e tyre dhe në fakt u ushtrua dhunë edhe ndaj tyre në terren. Një grusht personash që dëmtojnë pasurinë publike dhe dhunojnë çdo gjë nuk janë protestues, por vandalë. Policia vetëm ka reaguar pas dhunës së ushtruar. Agjencia e Mbikëqyrjes Policore ka për detyrë të verifikojë çdo rast, por e theksoj se nuk ka pasur asnjë tejkalim apo dalje jashtë protokollit nga ana e efektivëve. Përgjigja për vandalët do të jetë sipas ligjit dhe nuk do të ketë asnjë tolerim," u shpreh ministri Lamallari.

Të njëjtin qëndrim me kreun e dikasterit ndau edhe Drejtori i Përgjithshëm i Policisë së Shtetit, Skënder Hita, i cili sqaroi dinamikën operacionale të ngjarjes përpara selisë së Kuvendit. Hita theksoi se efektivët e rendit respektuan me përpiktëri kuadrin ligjor dhe vepruan në proporcion të plotë me shkallën e agresivitetit të shfaqur nga grupimi i dhunshëm, ndërsa vlerësoi gjithashtu marrëdhënien e institucionit me organet e reja të drejtësisë.

"Ne kishim vendosur barriera metalike për të garantuar perimetrin e sigurisë, por protestuesit i hoqën ato forcërisht, duke goditur me gurë dhe mjete të tjera rrethanore punonjësit e policisë. Në këto kushte, policia ka ushtruar detyrën e saj të plotë sipas ligjit. Ne do të sillemi dhe do të përgjigjemi gjithmonë në proporcion me veprimet e vetë protestuesve. Duhen veçuar prerazi një grusht individësh të dhunshëm nga pjesa tjetër e pjesëmarrësve në tubim. Ndërkohë, dua të theksoj se bashkëpunimi ynë me SPAK-un mbetet mjaft i mirë dhe intensiv," deklaroi kryepolici Hita.

Në mbyllje të deklaratave të tyre, drejtuesit e lartë të rendit publik paralajmëruan se të gjitha procedurat ligjore po ndiqen me përpiktëri nga grupet e posaçme hetimore. Ata bënë të ditur se çdo akt vandalizmi dhe sulmi ndaj personit apo pronës, i cili është dokumentuar përmes pamjeve filmike, do të referohet zyrtarisht në organin e akuzës për të marrë përgjigjen e merituar përpara ligjit.