TIRANË – Marius Dervishi, i njohur gjerësisht nga publiku në rrjetet sociale me pseudonimin “Zebervoki”, ka marrë vendimin e papritur për t’i dhënë fund karrierës së tij si efektiv në Policinë e Shtetit. Ky reagim i fortë i tij vjen fill pas tensioneve të fundit në protestat e mbajtura në kryeqytet, ku uniformat blu u përballën me kritika të shumta për menaxhimin e situatës.

Përmes një postimi të gjatë dhe emocional në llogarinë e tij në “Instagram”, Zebervoki ka bërë me dije se ditën e hënë do të dorëzojë zyrtarisht kërkesën për dorëheqje. Ai ka sqaruar se ky largim nuk lidhet me ndonjë problem brenda strukturave apo me kolegët, por me demoralizimin e thellë që ndjen nga mënyra se si perceptohet figura e policit në shoqëri.

“Media dhe populli kundër nesh, po na nxirrni autorë”

Sipas efektivit të ri, puna e përditshme dhe sakrificat e policëve në terren po anashkalohen, duke u zëvendësuar me epitete negative dhe paragjykime të përgjithësuara nga ana e opinionit publik.

Marius Dervishi (Zebervoki): "Jo sepse janë policët e këqinj, jo se nuk e dua më punën time, por thjesht sepse nuk dua të jap më asnjë lloj kontributi për asgjë. Policat gjithmonë kriminalë, policat gjithmonë dhunues, policat patronazhistë… Media kundër, populli kundër, e në fakt ne që jemi viktima po na nxirrni si autorë."

Pasioni që po braktiset nga mllefi qytetar

Marius Dervishi ka theksuar se pavarësisht mundësive të tjera që i ka ofruar jeta, ai zgjodhi me pasion të vërtetë të vishte uniformën e Policisë, por kjo dëshirë u thye nga ajo që ai e quan "urrejtje masive".

"Këtë pasion po e ‘braktis’, i nxitur nga mllefi dhe urrejtja që keni ju si popull për policat dhe nga përgjithësimi që bëni duke i konsideruar të gjithë njësoj. Unë nuk e kapërdij dot këtë lloj fushate ku në çdo gjë fajin e ka Policia," shkruan ai, duke e mbyllur mesazhin e tij me një paralajmërim: "Çka nuk e sheh syri i kamerës, e sheh Zoti lart."

Postimi i tij ka ngjallur reagime dhe debate të shumta online midis ndjekësve, duke u shpërndarë me shpejtësi në profilet e ndryshme sociale.