NEW YORK – Një aventurë ekstreme që nisi si një gjest për paqen botërore dhe një propozim unik martese ka përfunduar me prangosjen e një çifti të famshëm nga Rusia. Angela Nikolau dhe Vanya Beerkus, të njohur botërisht për pasionin e tyre ndaj ngjitjeve të rrezikshme pa pajisje sigurimi (rooftoppping), kanë sfiduar hapur autoritetet dhe gravitetin duke u ngjitur në majën e kullës ikonike në New York, Empire State Building.

Sipas një raportimi nga agjencia e lajmeve Reuters, dyshja arriti të depërtojë përmes sistemeve të sigurisë dhe u ngjit në një lartësi marramendëse prej 443 metrash virgjil mbi trotuaret e Manhattan-it.

Mesazhi i fortë nga antena 443 metra lart

Çifti rus u fotografua në momente tensioni dhe adrenaline të pastër, teksa qëndronin të varur në antenën historike të rrokaqiellit, pikërisht pranë dritës së kuqe sinjalizuese që shënjon pikën më të lartë të ndërtesës.

Përveç propozimit të martesës, qëllimi i tyre ishte edhe përcjellja e një mesazhi të fortë politik dhe social. Në atë lartësi ku era frynte me shpejtësi, ata shpalosën një banderolë të zezë me shkronja të mëdha të bardha ku shkruhej:

“Kur fuqia e dashurisë mposht dashurinë për pushtet, bota njeh paqen.”

Përfundimi në pranga

Pavarësisht spektaklit dhe mesazhit të tyre paqësor, sapo çifti ka zbritur nga struktura metalike, është përballur me Departamentin e Policisë së New York-ut (NYPD). Që të dy u arrestuan menjëherë me akuza që lidhen me shkeljen e pronës, cënimin e sigurisë publike dhe hyrjen e paligjshme në një objekt të rëndësisë së veçantë.

Nikolau dhe Beerkus kanë një histori të gjatë të ngjitjeve të tilla në rrokaqiejt më të lartë të globit, por kjo aventurë në zemër të New York-ut me siguri do të mbetet më e bujshmja e karrierës së tyre.