JALË – Inspektorati Kombëtar i Mbrojtjes së Territorit (IKMT) ka nisur një aksion paraditen e kësaj të premteje në plazhin e Jalës, me qëllim lirimin e hapësirave publike dhe zbatimin e ligjit përgjatë vijës bregdetare.

Objekt i këtij operacioni janë disa struktura me konstruksion të lehtë druri, kryesisht beach bar-e dhe ndërtime të tjera provizore, të cilat kanë rezultuar pa lejen përkatëse. Sipas të dhënave të para, këto subjekte kishin dalë jashtë hapësirave të përcaktuara nga Bashkia për ushtrimin e aktivitetit të tyre sezonal.

Në mbështetje të forcave të IKMT-së në terren janë angazhuar edhe efektivët e Policisë së Himarës, për të garantuar mbarëvajtjen e procesit.

Pronarët nisin çmontimin vullnetar

Përpara se mjetet e IKMT-së të ndërhynin për shembjen e plotë, një pjesë e pronarëve të këtyre strukturave kanë nisur vetë çmontimin vullnetar të pajisjeve dhe konstruksioneve prej druri, për të shpëtuar çfarë të munden nga materialet.

Deri më tani, situata në terren paraqitet e qetë dhe nuk është shënuar asnjë incident apo përplasje mes uniformave blu dhe operatorëve ekonomikë. Aksioni i IKMT-së pritet të vijojë edhe në orët në vazhdim, si pjesë e masave të shtrënguara për mbrojtjen e vijës bregdetare gjatë sezonit turistik.