TIRANË – Një protestë është paralajmëruar të mbahet këtë të premte në orën 19:00 në Tiranë, ku organizatorët deklarojnë se do të kërkojnë dorëheqjen e kryeministrit Edi Rama.

Sipas njoftimit të organizatorëve, grumbullimi i pjesëmarrësve do të nisë në sheshin "Skënderbej", ndërsa më pas protestuesit pritet të marshojnë drejt godinës së Kryeministrisë, ku do të shprehin kërkesat e tyre.

Organizatorët u kanë bërë thirrje qytetarëve nga i gjithë vendi, si edhe shqiptarëve që jetojnë jashtë vendit, t’i bashkohen tubimit, duke e cilësuar atë si protestën e 34-të radhazi.

Sipas tyre, kërkesa kryesore mbetet dorëheqja e kryeministrit Edi Rama. Ata kanë deklaruar gjithashtu se protestat do të vijojnë deri në përmbushjen e kësaj kërkese.

Në thirrjen publike për pjesëmarrje, organizatorët kanë përdorur edhe sloganin: "Ju erdhi fundi", duke e paraqitur atë si mesazhin kryesor të protestës.